වත්මන් රජය විශාල ජනවරමක් ලබා රටේ වගකීම බාර ගත් අවස්ථාවේ මේ රජය බලයට පත්වූ විගම ජන වරම උල්ලංඝනය කර ජනතා අයිතිය පාව දී තිබුණු ආකාරයටම අයි එම් එෆ් ගිවිසුමට එළඹිම මෑත කාලයේ සිදු වුණු ලොකුම පාවා දීම බවත් විපක්ෂ නායක සජිත් ප්‍රේමදාස මහතා පැවසීය.
එබැවින් මේ ගිවිසුම් වෙනස් කළ යුතු බවත් දෙසැම්බර් 12 වැනිදාට පෙර රජයේ යෝජනාවක් පරිදි පාර්ලිමේන්තුව කැඳවා මේ ගිවිසුම පාර්ලිමේන්තුවට ඉදිරිපත් කර විවාදයට ලක් කරන වෙලාවේ සහාය දෙන්න විපක්ෂය සූදානම් බවත් ඝානා රට මෙන් අප රට ද කටයුතු කළ යුතු බවත් පක්ෂ විපක්ෂ භේදයෙන් තොරව එයට උදව් කරන්න සූදානම් බවත් ඝානාව ගිය අඩිපාරේ රටක් ලෙස අප ද යා යුතු බවත් පවතින ගිවිසුම හරහා ගියොත් විෂම ණය චක්‍රයක කොටස්කරුවන් වී දශක ගණනාවක් පුරා ණය බරින් මිරිකුණු රටක් වන නිසා 12 වැනිදා ට පෙර ඇති කර ගන්නා එකගතාව පාර්ලිමේන්තුවට ඉදිරිපත් කරන ලෙසත් විපක්ෂ නායක සජිත් ප්‍රේමදාස මහතා පැවසීය.
විපක්ෂ නායක සජිත් ප්‍රේමදාස මහතා මේ බව කියා සිටියේ අද පාර්ලිමේන්තුවේ දී රජයේ අයි එම් එෆ් ගිවිසුම සම්බන්ධයෙන් අදහස් පළකරමිනි.
‘පොහොසත් රටක් ලස්සන ජීවිතයක් කියන ප්‍රතිපත්ති මාලාවේ 105 වැනි පිටුවට අනුව විකල්ප ණය තිරසර කරණ විශ්ලේෂණයක් හරහා මාලිමා රජය අයි එම් එෆ් එකත් සමඟ ඇති කර ගත් අවබෝධතා ඉදිරියට ක්‍රියාත්මක කරනවා කිව්වත් පසුගිය දින ඇති කර ගත් එකගතා මේ නව ක්‍රමය හරහා ද නැත්නම් රනිල් වික්‍රමසිංහ ජනාධිපතිවරයාගේ රජයේ ක්‍රමය ට ද කියා ප්‍රශ්න කරන බවත් මේ පොහොසත් රටක් ලස්සන ජීවිතයක් හැදීමේ ගමන පවතින අයි එම් එෆ් ගිවිසුම් එකගතාව මත ඉදිරියට යන්නේ නම් කඩා වැටෙන බවත් විපක්ෂ නායකවරයා පැවසීය.
පවතින අයි එම් එෆ් ගිවිසුම හරහා රට අනතුරට ලක් කරන්න එපා
අයි එම් එෆ් එක 2023 මාර්තු නිකුත් කළ වාර්තාවට අනුව නැවත ණය ගෙවීම ආරම්භ කිරීම 2033 ක්‍රියාත්මක කිරීම ආරම්භ කරන ලෙස ඉල්ලා සිටියත් මේ නව ගිවිසුම හරහා ණය ගෙවීමේ ක්‍රියාවලිය 2028 ආරම්භ වන බවත් තවත් වසර 4කින් ණය නැවත ගෙවීමේ ක්‍රියාවලියට ශක්තිමත් ආර්ථිකයක් ගෙවීමට කිසිදු රජයකට නොහැකි බවත් මේ ගිවිසුම හරහා රට අනතුරකට ලක් කර ඇති බවත් හිටපු ජනාධිපතිවරයාගේ අඩිපාරේම වත්මන් රජය සහ ජනාධිපතිවරයා යන බවත් විපක්ෂ නායකවරයා මෙහි දී අවධාරණය කළේය.
මේ රජය අයි එම් එෆ් වාර්තා කිසිදු පරිශීලනයකින් තොරව එකග වී විස්තීරණ ණය පහසුකම් ලබා ගැනීමේ අරමුණින් පමණක් කටයුතු කිරීම භයානක තත්ත්වයක් බවත් පවතින ගිවිසුම දුර්වල එකක් නිසා ඉන් ඔබ්බට යා යුතු බවත් විපක්ෂ නායකවරයා පැවසීය.
ඝානා රට ගිය අඩිපාරේ අපිත් යා යුතුයි
අප රටේ සෛරී බැදුම්කර ගනුදෙනුවට මැදිහත් වූ ආයතනයම ඝානා රටේ ණය කප්පාදුව සදහා මැදිහත් වූ බවත් එහි දී ගෙවිය යුතු ණය 37%කින් කප්පාදු කර ගත් බවත් ඊට අමතරව 6%ක පොලියකට එකග කර ගන්නට ඝානා රටට හැකි වුවත් අපට සිදුවන්නේ ඉන් හාත්පසින්ම වෙනස් දෙයක් බවත් 2025-2028 කාලයේ අප රටේ දළ දේශීය නිෂ්පාදිතයෙ සාමාන්‍ය බිලියන 107ක් ලෙස සැලකුවහොත් තිබූ ණයටත් වඩා වැඩිපුර ණය බිලියන 2.3ක් ගෙවීමට සිදුවන බවත් ඊට අමතරව 2028 සිට පොලි අනුපාතය 6.8%ක් වන විට 2032 ඔබ්බට පොලි අනුපාතය 9.65%ක් බවත් ඝානාවට පුළුවන් වුණා නම් මෙම යෝජනා ප්‍රතික්ෂේප කර හොඳ ගිවිසුමකට යන්න අපිටත් හැකි බවත් පවතින තත්ත්වය හමුවේ නම් අපිට ණය අඩු කර ගත නොහැකි බවත් විපක්ෂ නායකවරයා තවදුරටත් අවධාරණය කළේය.
අපේ විසදුමටත් කන්දෙන්න
මේ හේතුව නිසා ණය බර වැඩි වී අසහනය පීඩනය වැඩි ව දුප්පත්කම වැඩි වී සමාජයේ අවදානමට ලක් වූ කොට්ඨාසවලට හානි සිදුවන බවත් රාජ්‍ය ආදායමෙන් වැඩි මුදලක් මේ අධික ණය ගෙවන්න සිදුවන විට අධ්‍යාපනයට සෞඛ්‍යයට ධීවර ක්ෂේත්‍රයට කෘෂිකර්මාන්තයට සහ පොදු ජනතාවට කළ හැකි ආයෝජනය අඩුවන බවත් මේවාට ඇති විසඳුම් යෝජනා කරන්න තමා කැමති බවත් විපක්ෂ නායක සජිත් ප්‍රේමදාස මහතා පැවසීය.
මැද මාවතේ ගමන් කරන්න
රටක් ගොඩනගන්න අන්ත ධනවාදයත් අන්ත සමාජවාදයවත් සුදුසු නොමැති බවත් මැද මාවතේ යා යුතු බවත් වත්මන් රජය ද රනිල් වික්‍රමසිංහ ජනාධිපතිවරයාගේ මාවතේ යන බවත් නව ලිබරල්වාදී සංකල්පයේ මුදුන් මුලක් බවට රජය පත්ව වී ඇති බවත් මානුෂීය ධනවාදය අනුගමනය කරන ලෙසත් දේශීය ණය ප්‍රතිව්‍යුහගත කිරීමේ දී විරුද්ධ වූ ආකාරයට ම මෙහි දි ද කටයුතු කළ යුතු බවත් එම නිසා රට වෙනුවෙන් මේ අවස්ථාවේ ද එකට එකතු වන ලෙසත් පැවසූ විපක්ෂ නායකවරයා කියා සිටියේ දෙසැම්බර් 15 පරාටේ නීතිය තාවකාලිකව අත්හිටවූ කාලය නතර වන නිසා මේ සම්බන්ධයෙන් ද විධිමත් වැඩසටහනක් ක්‍රියාත්මක කරන ලෙසයි.
