වැඩබලන පොලිස්පතිවරයා ලෙස පත් කළ ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය ඊයේ සිය ධුරයේ රාජකාරී කටයුතු ආරම්භ කළා.
ජනාධිපති මාධ්‍ය අංශය නිවේදනය කළේ, ආණ්ඩුක්‍රම ව්‍යවස්ථාවෙන් ජනාධිපතිවරයා වෙත පැවරී ඇති බලතල ප්‍රකාරව ජනාධිපති අනුර කුමාර දිසානායක විසින් මෙම පත් කිරීම සිදු කර ඇති බවයි.
ප්‍රියන්ත වීරසූරිය, වැඩබලන පොලිස්පතිවරයා ලෙස පත් වන විට උතුරුමැද පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස කටයුතු කළා.
පොලිස් කොස්තාපල්වරයෙකු ලෙස සේවයට එක් වී පොලිස්පතිවරයා ලෙස පත්වීම් ලද එකම නිලධාරියා මොහු බවයි ජනාධිපති මාධ්‍ය අංශය ප්‍රකාශ කළේ.
කොළඹ විශ්ව විද්‍යාලයේ නීතිවේදී උපාධිධාරියෙකු වන ප්‍රියන්ත වීරසූරිය, මානව සම්පත් කළමණාකරණය පිළිබදව ව්‍යාපාර පරිපාලනවේදී උපාධිය ද ලබාගෙන තිබෙනවා.
මීට පෙර හිටපු ජනාධිපති රනිල් වික්‍රමසිංහ විසින් දේශබන්දු තෙන්නකෝන් පොලිස්පතිවරයා ලෙස පත්කරනු ලැබුවේ පසුගිය පෙබරවාරි 26 වැනිදායි. ඒ මෙරට 36 වැනි පොලිස්පතිවරයා ලෙසයි.
කෙසේ වෙතත් දේශබන්දු තෙන්නකෝන් පොලිස්පති ධුරයේ කටයුතු කිරීම වළක්වාලමින් ශ්‍රේෂ්ඨාධිකරණය පසුගිය ජූලි 24 වැනිදා අතුරු තහනම් නියෝගයක් නිකුත් කළා.
