ජාතික ආරක්‍ෂාව රටේ ඉහළම ප්‍රමුඛතාවයි
සාමයේ වටිනාකමද අප කිසිදා අමතක නොකළ යුතුයි –
“යුධ ගැටුම් නිසාවෙන් ඇති වන අහිතකර බලපෑම සහ එහි අමිහිරි මතකයන් අප සියැසින් දැක තිබෙන අතරම සාමකාමී පරිසරයක් තුළ ඇති සුවකිරීමේ බලයද අත්දැක ඇත්තෙමු. ඔබ ඔබේ ඉදිරි ගමනේ මීළඟ අදියරට පා තබන විට, ජාතියක් ලෙස අප අපගේ අතීතයෙන් ඉගෙන ගන්නා පාඩම්ද ඔබ සමඟ ඉදිරි දිවියට අත්දැකීමක් කරගන්නා ලෙස මම ඔබෙන් ඉල්ලා සිටිමි. එපමණක් නොව සාමයේ, ස්ථාවරත්වයේ සහ සහයෝගීතාවයේ වටිනාකම පිළිබඳවද අප කිසිදා අමතක නොකරමු”.
ඊයේ(15) දින කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ පැවති ජෙනරාල් ශ්‍රීමත් ජෝන් කොතලාවල ආරක්‍ෂක විශ්වවිද්‍යාලයේ උපාධි ප්‍රධානෝත්සවය අමතමින් ආරක්‍ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) මහතා පැවසීය.
උපාධි ප්‍රදානෝත්සවයේ අවසන් සැසියේ ප්‍රධාන ආරාධිත අමුත්තා ලෙස ආරක්‍ෂක ලේකම් එයාර් වයිස් මාර්ෂල් තුයියකොන්තා (විශ්‍රාමික) මහතා මෙහිදි සහභාගි විය.
එහිදී ජාතික ආරක්‍ෂක විද්‍යාලය, ආරක්‍ෂක සේවා අණ සහ මාණ්ඩලික විද්‍යාලය, ශ්‍රී ලංකා යුධ හමුදා විද්‍යා පීඨය, යුද හමුදා භට කාර්ය සම්පාදන විද්‍යාලය, නාවික සහ සාගරික විද්‍යා පීඨය සහ ශ්‍රී ලංකා ගුවන් හමුදා විද්‍යා පීඨය යන අධ්‍යයන ආයතන වලින් මුලික උපාධි, පශ්චාත් උපාධි, මෙන්ම ආචාර්ය උපාධි පාඨමාලා සම්පුර්ණ කල ත්‍රිවිධ හමුදා නිලධාරීන්, ශිෂ්‍යභට නිලධාරීන්, දිවා විද්‍යාර්ථයින් ඇතුළු උපාධි අපේක්‍ෂකයින් 1,728 ක් උපාධි ලබාගත්හ.
මෙම අවස්ථාවට ආරක්‍ෂක මාණ්ඩලික ප්‍රධානි, ත්‍රිවිධ හමුදාපතිවරුන්, පොලිස්පති, අනෙකුත් විශ්වවිද්‍යාලවල උපකුලපතිවරුන්, රාජ්‍යතාන්ත්‍රික නිලධාරීන්, කොතලාවල ආරක්‍ෂක විශ්වවිද්‍යාලයේ කළමනාකරණ මණ්ඩලයේ නිලධාරීන්, ජ්‍යෙෂ්ඨ ත්‍රිවිධ හමුදා සහ පොලිස් නිලධාරීන්, කොතලාවල ආරක්‍ෂක විශ්වවිද්‍යාලයේ අධ්‍යයන, හමුදා සහ පරිපාලන කාර්ය මණ්ඩල සාමාජිකයන් සහ උපාධි අපේක්‍ෂයින්ගේ පවුල්වල සාමාජිකයින්ද ඇතුළු විශාල පිරිසක් සහභාගීවී සිටියහ.
ත්‍රිවිධ හමුදා නිලධාරීන්ගේ අධ්‍යාපන අවශ්‍යතා සපුරාලීමේ අරමුණින් 1981 වර්ෂයේදී ජෙනරාල් ශ්‍රීමත් ජෝන් කොතලාවල ආරක්‍ෂක විශ්වවිද්‍යාලය ආරම්භ කරන ලදි.
එම විශ්වවිද්‍යාලය අංගසම්පූර්ණ විශ්වවිද්‍යාලයක් බවට තත්ත්වයෙන් උසස් කරන ලද අතර 2009 වසරේ දී සිවිල් උපාධි අපේක්‍ෂකයින් හටද මෙහි අධ්‍යයන කටයුතු සිදුකිරීමට අවස්ථාව සලසා දෙන ලදි. පොදුරාජ්‍ය මණ්ඩලීය විශ්වවිද්‍යාල සංගමයේ සහ ජාත්‍යන්තර විශ්වවිද්‍යාල සංගමයේ සාමාජිකත්වය දරණ කොතලාවල ආරක්‍ෂක විශ්වවිද්‍යාලය, අද වන විට විදෙස් රටවල සිසුන් ද ඇතුළුව ශිෂ්‍ය ශිෂ්‍යාවන් විශාල ප්‍රමාණයකට මුලික, පශ්චාත් හා ආචාර්ය උපාධි මෙන්ම පශ්චාත් උපාධි ඩිප්ලෝමා පාඨමාලාවන් විශාල ප්‍රමාණයක් හැදෑරීම සඳහා අවශ්‍ය පහසුකම් සහිත අංගසම්පූර්ණ විශ්වවිද්‍යාලයක් බවට පත්වී ඇත.
