ඉදිරියේදී පැවැත්වීමට නියමිත LPL තරංගාවලියේදී තරග පාවාදීමකට සැලසුම් කළේ යැයි සැකපිට අත්අඩංගුවට ගන්නා ලද දඹුල්ල කණ්ඩායමේ හිමිකරු වූ බ්‍රිතාන්‍ය පුරවැසි භාවය හිමි තමිම් රහ්මාන් නැමති සැකකරු ලබන 07 වනදා දක්වා තවදුරටත් රක්ෂිත බන්ධනාගාර ගත කරන ලෙස කොළඹ මහේස්ත්‍රාත් අධිකරණය නියම කළා.
මෙම පැමිණිල්ල අද (31) කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ කැඳවනු ලැබුවා.
එහිදී ක්‍රීඩා වැරදි වැළැක්වීමේ විමර්ශන අංශය අධිකරණයට දැනුම් දුන්නේ මෙම සිද්ධියට අදාළව තවදුරටත් පරීක්ෂණ සිදු කරන බවයි.
මෙම තරග පාවාදීමේ සිද්ධිය සම්බන්ධයෙන් පැමිල්ලිකරු හා විත්තිකරු අතර ඇතිවූ බව කියන දුරකථන සංවාදවලට අදාළ හඩපට අධිකරණයට ඉදිරිපත් කරන ලෙසත් මෙහිදී මහේස්ත්‍රාත්වරයා විසින් විමර්ශන සිදුකරන පොලිස් කණ්ඩායමට නියම කළා.
ඉන් අනතුරුව නඩුව නැවත ලබන 07 වනදා කැඳවීමටද නියම වුණා.
