නීතිවිරෝධී ලෙස මෙරටට ආනයනය කරන ලද යතුරුපැදි 21ක් පොලිස් භාරයට ගැනීමට මධ්‍යම අපරාධ විමර්ශන කාර්යාංශය සමත් වී තිබේ.
වැඩබලන පොලිස්පති ප්‍රියන්ත වීරසූරිය මහතාගේ නියෝග සහ උපදෙස් මත දිවයින පුරා සිදු කෙරෙන අපරාධ සහ මත්ද්‍රව්‍ය වැටලීම්වලට අනුකූලව, වැඩබලන පොලිස්පතිවරයාට ලැබුණු විශේෂ තොරතුරක් මත මධ්‍යම අපරාධ විමර්ශන කාර්යාංශයේ අධ්‍යක්ෂ පොලිස් අධිකාරී කමල් ආරියවංශ මහතා ඇතුළු නිලධාරීන් කණ්ඩායමක් විසින් මෙම වැටලීම සිදු කරන ලදී.
නාගරවැව කුරුළු අභයභූමියේ කුරුළු ආහාර ගබඩාවේ සඟවා තිබූ විදේශ රටවල නිෂ්පාදනය කරන ලද යතුරුපැදි 21ක් පොලිසිය විසින් සොයා ගෙන ඇත.
මෙම එක් එක් යතුරුපැදියේ වටිනාකම රුපියල් කෝටි එකහමාරකට වඩා වැඩි බව පොලිසිය පැවසීය.
කුරුළු අභයභූමි පරිශ්‍රයේ නීතිවිරෝධී ලෙස වගා කරන ලද ගංජා පැළ 04ක් සමඟ මෙම සත්ව ගොවිපළේ කළමනාකරු සහ ගබඩාකරු ද පොලිසිය විසින් අත්අඩංගුවට ගෙන තිබේ.
අත්අඩංගුවට ගත් සැකකරුවන් මාතර සහ මිද්දෙනිය ප්‍රදේශවල පදිංචිකරුවන් වන අතර, ඔවුන් වයස අවුරුදු 40 සහ 50 වයස්වල පසුවන්නන් වේ.
