අකුරේගොඩ ප්රදේශයේ සිදුවූ වෙඩි තැබීමේ සිද්ධිය සම්බන්ධයෙන් පුළුල් පරීක්ෂණ පවත්වා සැකකරුවන් කොටු කරගැනීම සඳහා විශේෂ පොලිස් කණ්ඩායම් 12ක් යොදවා ඇති බව බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදවත්ත මහතා පවසයි. පොලිස් මූලස්ථානයේ පැවැති විශේෂ මාධ්ය හමුවකට එක්වෙමින් ඔහු අවධාරණය කළේ, මෙම අපරාධය සම්බන්ධයෙන් පොලීසියේ දැඩි අවධානය යොමුව ඇති බවත් විමර්ශන කටයුතු මේ වන විට සැලකිය යුතු මට්ටමකින් ප්රගතියක් ලබා ඇති බවත්ය.සිද්ධියට අදාළව සමාජ මාධ්ය හා ජනමාධ්ය ඔස්සේ ප්රචාරය වන ඇතැම් කරුණු සම්බන්ධයෙන් අදහස් දැක්වූ ජ්යෙෂ්ඨ නියෝජ්ය පොලිස්පතිවරයා, එම තොරතුරු සියල්ල නිල වශයෙන් තහවුරු කිරීමට හෝ බැහැර කිරීමට මේ අවස්ථාවේ නොහැකි බව සඳහන් කළේය. විමර්ශනවල සංවේදීභාවය මත හෙළි කළ හැක්කේ සීමිත තොරතුරු ප්රමාණයක් පමණක් බවත්, ඇතැම් කරුණු අනාවරණය කිරීම පරීක්ෂණවලට බාධාවක් විය හැකි බවත් ඔහු පෙන්වා දුන්නේය. විශේෂයෙන්ම අදාළ නීතිඥවරයා සම්බන්ධයෙන් පළවන වාර්තා පිළිබඳව පොලීසිය තවමත් නිල ප්රකාශයක් නිකුත් කර නොමැති බවද මෙහිදී පැහැදිලි කෙරිණි.නීතිඥවරයකුට ඕනෑම පාර්ශවයක් වෙනුවෙන් පෙනී සිටීමේ අයිතිය ඇති අතර, මෙම වෙඩි තැබීමට ඔහු පෙනී සිටි නඩු කටයුතුවල බලපෑමක් තිබේද යන්න පිළිබඳව දැනටමත් විමර්ශන ක්රියාත්මක වේ. කෙසේ වෙතත්, යම් අපරාධකරුවෙකු වෙනුවෙන් පෙනී සිටීම මෙම ප්රහාරයට හේතුවක් වූවාද යන්න පිළිබඳව ඍජු නිගමනයකට එළඹිය හැක්කේ ප්රධාන සැකකරුවන් අත්අඩංගුවට ගෙන මූලික ප්රශ්න කිරීම් අවසන් කිරීමෙන් පසුව බව සජීව මැදවත්ත මහතා වැඩිදුරටත් ප්රකාශ කළේය.
අකුරේගොඩ වෙඩි තැබීම: විමර්ශනයට විශේෂ පොලිස් කණ්ඩායම් 12ක්!
