ඇමරිකානු ඩොලරයේ අගය අනෙකුත් ප්රධාන මුදල් ඒකකවලට සාපේක්ෂව ශීඝ්රයෙන් පහත වැටෙමින් පවතින අතර, මෙය 2025 වසරේ සිට දක්නට ලැබුණු දශකයකට ආසන්න කාලයක වාර්තා වූ දරුණුතම වාර්ෂික පසුබෑමේ දිගුවක් ලෙස හඳුනාගත හැකිය. පසුගිය අඟහරුවාදා දිනයේදී පමණක් ඩොලර් දර්ශකය 1.3%කින් පහත වැටුණු අතර, ඒ අනුව 2026 වසර ආරම්භයේ සිට මේ දක්වා ඩොලරයේ අගය 2.6%කින් ක්ෂය වී ඇත. 2025 වසර තුළදී පමණක් එය 9.5%ක දැවැන්ත අගයකින් කඩා වැටුණි. මෙම තත්ත්වය හමුවේ යුරෝව, බ්රිතාන්ය පවුම සහ ජපන් යෙන් මුදල් ඒකකවල අගය ඉහළ ගොස් ඇති අතර, යුරෝව 2021 වසරෙන් පසුව පළමු වරට ඩොලර් 1.2 සීමාව පසුකර තිබේ.ආර්ථික විශ්ලේෂකයින් පවසන්නේ අමෙරිකානු ජනාධිපති ඩොනල්ඩ් ට්රම්ප්ගේ අනුමාන කළ නොහැකි ප්රතිපත්ති සම්පාදනය හේතුවෙන් ආයෝජකයින් තුළ ඩොලරය කෙරෙහි ඇති විශ්වාසය බිඳවැටීම මෙම පරිහානියට ප්රධාන හේතුව වී ඇති බවයි. කෙසේ වෙතත්, ඇමරිකානු අපනයන සහ නිෂ්පාදන ක්ෂේත්රය ප්රවර්ධනය කිරීමේ උපක්රමයක් ලෙස ට්රම්ප් සහ ඔහුගේ ආර්ථික කණ්ඩායම සිතාමතාම ඩොලරයේ අගය පහත හෙළීමට උත්සාහ කරන බවටද මතයක් පවතී. මේ පිළිබඳව කළ විමසීමකදී ජනාධිපති ට්රම්ප් ප්රකාශ කර ඇත්තේ ඩොලරයේ අගය වැටීම පිළිබඳ තමා කණගාටු නොවන අතර එය “ඉතා හොඳ” දෙයක් බවයි. මීට අමතරව, ඇමරිකානු මධ්යම බැංකුවේ (Federal Reserve) වර්තමාන පාලක මණ්ඩල සාමාජික ස්ටීවන් මිරාන් ද මීට පෙර පෙන්වා දී තිබුණේ වෙළඳ හිඟය පියවා ගැනීම සඳහා ඩොලරයේ අගය අඩු කිරීම ප්රධාන මෙවලමක් ලෙස භාවිතා කළ හැකි බවයි.
ඇමරිකානු ඩොලරය දරුණු ලෙස ඇද වැටෙයි: වසර 10කට පසු වාර්තා වූ දරුණුතම පසුබෑම!
