ඉන්දියාවෙන් සාගරය කළඹන දැවැන්ත බලපෑමක්: කිලෝමීටර් 3,500ක ඉලක්ක හඹායන න්‍යෂ්ටික මිසයිලයක් අත්හදා බලයි

කලාපීය ආරක්ෂාව සහ නාවික බලය ශක්තිමත් කිරීමේ අරමුණින් ඉන්දියාව බෙංගාල බොක්ක ආශ්‍රිතව නවතම බැලස්ටික් මිසයිල අත්හදා බැලීමක් සාර්ථකව සිදුකර තිබේ. විශාඛාපට්නම් වෙරළට ඔබ්බෙන් වූ මුහුදු සීමාවේදී සිදුකළ මෙම පරීක්ෂණයේදී, මුහුද යට සිට ප්‍රහාර එල්ල කිරීමේ හැකියාව ඇති අධිබලැති මිසයිලයක් සාර්ථකව දියත් කළ බව විදෙස් වාර්තා පෙන්වා දෙයි. මෙය ඉන්දියාවේ නාවික ආරක්ෂක ඉතිහාසයේ වැදගත් සන්ධිස්ථානයක් ලෙස සැලකේ.​මෙම සුවිශේෂී ප්‍රහාරක හැකියාව ප්‍රදර්ශනය කර ඇත්තේ ඉන්දියාවේ න්‍යෂ්ටික බලයෙන් ක්‍රියාත්මක වන ‘INS අරිගාට්’ (INS Arighat) සබ්මැරීනය හරහා වීම විශේෂත්වයකි. ‘K-4’ වර්ගයට අයත් මෙම මිසයිලය, මුහුද පදනම් කරගත් ඉන්දීය න්‍යෂ්ටික ප්‍රහාරක බලඇණියට එක්වූ ප්‍රබලතම අවියක් ලෙස හඳුනාගත හැකිය. සබ්මැරීනයක සිට දියත් කර ඉතා නිවැරදිව ඉලක්කය කරා ගමන් කිරීමේ හැකියාව මෙහිදී මැනවින් තහවුරු වී ඇත.​තාක්ෂණික දත්තයන්ට අනුව මෙම K-4 මිසයිලය කිලෝමීටර් 3,500ක දුර ප්‍රමාණයක් ආවරණය කිරීමට සමත් වන අතර, එය ටොන් 2.5ක් බරැති න්‍යෂ්ටික යුධ ශීර්ෂයක් රැගෙන යාමේ හැකියාවෙන් යුක්තය. අරිහන්ත් (Arihant) පන්තියේ සබ්මැරීන සමඟ ඒකාබද්ධව ක්‍රියා කළ හැකි පරිදි නිපදවා ඇති මෙම මිසයිලය, ඕනෑම හදිසි අවස්ථාවකදී සතුරා නොසිතන මොහොතක මුහුද යට සිට විනාශකාරී ප්‍රහාරයක් එල්ල කිරීමට මඟ පාදයි.​මෙම අත්හදා බැලීමත් සමඟ ඉන්දියාව, මුහුදේ සිට දියත් කළ හැකි මහා පරිමාණ බැලස්ටික් මිසයිල තාක්ෂණය සහිත ලොව බලවත් රටවල් කිහිපය අතරට තවදුරටත් සමීප වී තිබේ. මෙය හුදෙක් ආයුධ පරීක්ෂණයක් පමණක් නොව, කලාපීය බල තුලනය හමුවේ ඉන්දියාව සතු ස්වයං ආරක්ෂක ශක්තිය ලොවටම ප්‍රදර්ශනය කිරීමක් බව ආරක්ෂක අංශ විචාරකයෝ පවසති.