පවතින ලෝක වෙළඳපොළ තත්ත්වයන් අනිසි ලෙස භාවිතා කරමින් රජය විසින් සිදුකළ ඉන්ධන මිල ඉහළ දැමීම වහාම අකුලා ගත යුතු බව විපක්ෂ නායක සජිත් ප්රේමදාස මහතා අවධාරණය කරයි. මැදපෙරදිග යුදමය වාතාවරණය පදනම් කරගනිමින්, අඩු මිලට ආනයනය කළ තොග සඳහා මෙලෙස ඉහළ මිලක් අය කිරීම අතිශය දූෂිත මෙන්ම ජනතාව රවටන ක්රියාවක් බව ඔහු පෙන්වා දෙයි.ලෝක වෙළඳපොළේ බොරතෙල් බැරලයක මිල ඇමරිකානු ඩොලර් 70ක්ව පැවති සමයේ මෙරටට ගෙන්වන ලද තොග සඳහා නව මිල සූත්රය ක්රියාත්මක කිරීම බරපතල අසාධාරණයකි. මිල ඉහළ යන බව පවසමින් රජය ජනතාවට අසත්ය ප්රකාශ කර ඇති බවත්, මේ වන විටත් ලෝක වෙළඳපොළේ තෙල් මිල ශීඝ්රයෙන් පහත වැටෙමින් පවතින බවත් විපක්ෂ නායකවරයා මෙහිදී සඳහන් කළේය.මෙම අසාධාරණ මිල සංශෝධනය හේතුවෙන් සාමාන්ය පාරිභෝගිකයාගේ සිට සුළු පරිමාණ ව්යාපාරිකයා සහ නිෂ්පාදකයා දක්වා සමස්ත සමාජයම දැඩි පීඩනයකට පත්ව ඇත. බදු බර සහ ජීවන වියදම හමුවේ මිරිකී සිටින ජනතාව මත මෙවැනි අමතර බරක් පැටවීම ඔවුන්ගේ මූලික අයිතිවාසිකම් උල්ලංඝනය කිරීමක් ලෙසද ඔහු හඳුන්වා දුන්නේය.මිල දී ගත් සැබෑ පිරිවැය මත පදනම්ව ඉන්ධන මිල තීරණය විය යුතු බව පවසන සජිත් ප්රේමදාස මහතා, එසේ නොකිරීම ජනතාවගේ ජීවත්වීමේ අයිතියට එල්ල කරන මරු පහරක් බව පවසයි. ජනතාව ගසාකෑම වෙනුවට බලශක්ති සුරක්ෂිතභාවය වෙනුවෙන් ප්රායෝගික සහ විනිවිදභාවයකින් යුත් වැඩපිළිවෙලක් රජය විසින් වහාම ක්රියාත්මක කළ යුතු බව ඔහුගේ මතයයි.පවතින යථාර්ථයෙන් බැහැරව ජනතාව පීඩාවට පත් කරන පාලනයක් ගෙනයනවා වෙනුවට, යුක්ති සහගත සහ සාධාරණ ක්රමවේදයක් අනුගමනය කරන ලෙස රජයෙන් ඉල්ලා සිටී. ඒ අනුව, වහාම ක්රියාත්මක වන පරිදි ඉන්ධන මිල අඩු කර පීඩිත ජනතාවට සහනයක් සැලසීමට කටයුතු කරන ලෙස විපක්ෂ නායකවරයා වැඩිදුරටත් අවධාරණය කළේය.
ඉන්ධන මිල වැඩිකිරීම මහජනතාවට එල්ල කළ මරු පහරක්!
