ශ්රී ලංකාවේ සත්කාරකත්වයෙන් පැවැත්වෙන අයි.සී.සී. (ICC) පිරිමි විස්සයි-20 ලෝක කුසලාන ක්රිකට් තරඟාවලිය හේතුවෙන් 2026 වසරේ මුල් සති කිහිපය තුළ මෙරට සංචාරක ක්ෂේත්රය දෙගුණයක වර්ධනයක් වාර්තා කර ඇත. ශ්රී ලංකා සංචාරක සංවර්ධන අධිකාරියේ නිල සංඛ්යාලේඛනවලට අනුව, 2026 වසරේ පළමු දින 45 තුළ මෙරටට පැමිණ ඇති සංචාරකයින් සංඛ්යාව 401,787ක් වන අතර, එය පසුගිය වසරට සාපේක්ෂව 12.5%ක වර්ධනයකි. විශේෂයෙන්ම පෙබරවාරි මාසයේ මුල් දින 12 තුළ පමණක් සංචාරකයින් 124,460ක් පැමිණ ඇති අතර, එය 19%ක කැපී පෙනෙන ඉහළ යාමකි. ඉන්දියාව, එක්සත් රාජධානිය, ඕස්ට්රේලියාව, රුසියාව, ජර්මනිය, චීනය සහ ඇමරිකා එක්සත් ජනපදය යන රටවලින් ක්රිකට් ලෝලීන් විශාල වශයෙන් පැමිණීම මෙම ක්රීඩා සංචාරක ප්රබෝධයට ප්රධාන හේතුව වී තිබේ.තරඟ පැවැත්වෙන කොළඹ සහ මහනුවර නගරවල හෝටල් කාමර ධාරිතාව උපරිම මට්ටමට පත්ව ඇති අතර, එම ඉල්ලුම ගල්කිස්ස සහ මීගමුව වැනි ප්රදේශ දක්වා ද ව්යාප්ත වී ඇත. ලෝක කුසලාන කාලසීමාව තුළ සංචාරකයින් මෙරට රැඳී සිටින සාමාන්ය කාලය ඉහළ ගොස් ඇති අතර නවාතැන්, ප්රවාහන සහ විනෝද කටයුතු සඳහා ඔවුන් කරන වියදම් ද කැපී පෙනෙන ලෙස වර්ධනය වී තිබේ. මෙම වර්ධනය තිරසාරව පවත්වා ගැනීම සඳහා ශ්රී ලංකා සංචාරක ප්රවර්ධන කාර්යාංශය ඩිජිටල් ප්රචාරණ වැඩසටහන් දියත් කර ඇති අතර, ශ්රී ලංකා සංචාරක හා හෝටල් කළමනාකරණ ආයතනය විසින් ක්රීඩා සංචාරක කළමනාකරණය වැනි නව පුහුණු පාඨමාලා ද හඳුන්වා දී ඇත. ලෝක කුසලානය හරහා ලැබුණු ගෝලීය අවධානය උපයෝගී කර ගනිමින් 2026 වසර පුරා මෙම වර්ධනය පවත්වාගෙන යාමට සංචාරක අමාත්යාංශය සැලසුම් කර ඇත.
ක්රිකට් උන්මාදය සමඟ ලාංකීය සංචාරක ක්ෂේත්රයේ දැවැන්ත පිම්මක්!
