ලොව පුරා කිතුනු ජනතාව අතිමහත් භක්තියෙන් සමරනු ලබන පාස්කු ඉරිදා දිනය අදට (05) යෙදී තිබේ. ජේසුස් ක්රිස්තුස් වහන්සේ මළවුන්ගෙන් උත්ථානය වීම සිහිපත් කෙරෙන මෙම උතුම් අවස්ථාව නිමිත්තෙන් දිවයිනේ සෑම කිතුනු දෙව්මැඳුරකම විශේෂ දේව මෙහෙයන් සහ ආගමික වතාවත් සංවිධානය කර ඇත. ඊයේ දින මහ සිකුරාදා වත්පිළිවෙත්වලට සහභාගී වූ බැතිමතුන් අද දින දේව මෙහෙයන් තුළින් උත්ථාන වූ ක්රිස්තුස් වහන්සේගේ ආශිර්වාදය අපේක්ෂා කරති.මෙවර පාස්කු සැමරුමේදී මනුෂ්යත්වය සහ ලෝක සාමය කෙරෙහි වැඩි අවධානයක් යොමු කර තිබීම සුවිශේෂී වේ. විශේෂයෙන් මැදපෙරදිග පවතින යුදමය වාතාවරණය සමනය වී ලොව පුරා සාමය උදාවන ලෙසත්, මිනිස් සිත් තුළ පවතින වෛරය හා ක්රෝධය දුරුවන ලෙසත් මෙම දේව මෙහෙයන්වලදී විශේෂ යාච්ඤාවන් සිදුකෙරේ. මීගමුව දූව සහ හිනිදුම වැනි ප්රසිද්ධ වන්දනා ස්ථාන කේන්ද්ර කරගනිමින් පැවැත්වෙන පාස්කු වැඩසටහන් සඳහා ද විශාල පිරිසක් එක්ව සිටිති.මේ අතර, 2019 වසරේ සිදුවූ පාස්කු ප්රහාරයෙන් පීඩාවට පත් වූවන් සිහිපත් කිරීමේ විශේෂ වැඩසටහන් හෙට දිනට නියමිතව ඇත. කොච්චිකඩේ ශාන්ත අන්තෝනි, කටුවාපිටිය ශාන්ත සෙබස්තියන් සහ මඩකළපුව සියොන් දේවස්ථාන කේන්ද්ර කරගනිමින් එම වින්දිතයන්ට ආශිර්වාද ප්රාර්ථනා කිරීමේ විශේෂ යැදුම් වාර පවත්වන බව කතෝලික සභාව වැඩිදුරටත් නිවේදනය කරයි.
කිතුනු හදවත් ආලෝකවත් කරන පාස්කු ඉරිදා උදාවෙයි!
