ශ්රී ලංකාව දැඩි ආර්ථික අර්බුදයකට මුහුණ දී සිටින පසුබිමක, මෙරට ප්රමුඛ පෙළේ ව්යාපාරිකයෙකු වන ඩඩ්ලි සිරිසේන මහතා විසින් ආනයනය කරන ලද ‘රෝල්ස් රොයිස් ෆැන්ටම් 8’ (Rolls-Royce Phantom 8 Series 2 EWB) වර්ගයේ සුපිරි මෝටර් රථයේ වටිනාකම අඩු කර පෙන්වීම හේතුවෙන් ශ්රී ලංකා රේගුව රුපියල් මිලියන 70ක දඩයක් නියම කර ඇත. ලොව පුරා ඒකක 25ක් පමණක් නිපදවා ඇති ඉතා දුර්ලභ ගණයේ රථයක් වන මෙය, ආනයන ලියකියවිලිවල සඳහන් කර තිබුණේ සාමාන්ය රෝල්ස් රොයිස් රථයක් ලෙස ස්ටර්ලින් පවුම් 417,000කට (රුපියල් මිලියන 173.8ක් පමණ) වුවද, පරීක්ෂණ වලදී එය සාමාන්ය රථයකට වඩා දිගින් වැඩි වැඩි මිලක් සහිත ‘Extended Wheelbase’ මාදිලියක් බව තහවුරු වී තිබේ.මෙම සිදුවීම සම්බන්ධයෙන් සමාජ මාධ්ය ඔස්සේ අදහස් දක්වමින් ඩඩ්ලි සිරිසේන මහතා පවසා ඇත්තේ මෙම රථය තමන්ටත්, පොළොන්නරුවටත්, රටටත් ආඩම්බරයක් බවයි. සිය බිරිඳගේ රන් ආභරණ උකස් කර ලොරි රථයක් මිලදී ගැනීමෙන් ආරම්භ කළ තම ව්යාපාරික ගමනේ සාර්ථකත්වය මෙයින් පිළිබිඹු වන බව ඔහු සඳහන් කර ඇත. කෙසේ වෙතත්, රේගු මාධ්ය ප්රකාශක චන්දන පුංචිහේවා මහතා අවධාරණය කළේ අදාළ සියලු බදු මුදල් සහ නියම කළ දඩ මුදල් ගෙවීමෙන් අනතුරුව රථය නිදහස් කළ බවත්, බදු ගෙවීමෙන් කිසිදු පුද්ගලයෙකුට නිදහස් විය නොහැකි බවත්ය.සාමාන්ය ජනතාව ආර්ථික පීඩනයෙන් පීඩා විඳින මොහොතක මෙවැනි අති සුඛෝපභෝගී රථ මෙරටට ගෙන්වීම සහ ඒවායේ වටිනාකම් සැඟවීමට උත්සාහ කිරීම පිළිබඳව සමාජය තුළ දැඩි කතාබහක් නිර්මාණය වී ඇත. 2025 මැයි මාසයේදී රෝල්ස් රොයිස්, බෙන්ට්ලි සහ BMW වැනි සුපිරි මෝටර් රථ කිහිපයක්ම මෙරටට ගුවන් මගින් ගෙන්වා තිබූ අතර, එය ශ්රී ලංකා ඉතිහාසයේ වාර්තා වූ මිල අධිකම ගුවන් භාණ්ඩ තොගයක් ලෙස ද සැලකේ.
ඩඩ්ලි සිරිසේනගේ සුපිරි රෝල්ස් රොයිස් රථයට රුපියල් කෝටි 7ක දඩයක්!
