දුම්රිය දෙපාර්තමේන්තුව තුළ පවතින පරිපාලන අකාර්යක්ෂමතාවය හේතුවෙන් මගී ජනතාව මෙන්ම සේවකයින් ද දැඩි දුෂ්කරතාවයට පත්ව ඇති බව පවසමින් දුම්රිය ස්ථානාධිපති සංගමය දැඩි විරෝධයක් ප්රකාශ කර සිටියි. දුම්රිය ධාවනය නිසි ලෙස සැලසුම් නොකිරීම සහ කාලසටහන් අවුල් වීම නිසා දිනපතා මගීන් පීඩාවට පත්වන අතර, මෙම මෙහෙයුම් දුර්වලතා සම්බන්ධයෙන් දෙපාර්තමේන්තු බලධාරීන් සෘජුව වගකිව යුතු බව එම සංගමය අවධාරණය කරයි.සේවක අයිතිවාසිකම් සම්බන්ධයෙන් ද බරපතළ ගැටලු කිහිපයක් මතුව ඇති අතර, විශේෂයෙන්ම ස්ථානාධිපති බඳවා ගැනීම් සහ උසස්වීම්වලට අදාළ නීතිමය විධිවිධාන සකස් කිරීම දිගින් දිගටම ප්රමාද වීම සේවකයින්ගේ මානසිකත්වයට දැඩි බලපෑමක් එල්ල කර තිබේ. එසේම රජය විසින් රාජ්ය සේවකයන් සඳහා අනුමත කර ඇති රුපියල් 400,000ක ආපදා ණය මුදල, දුම්රිය බලධාරීන් විසින් රුපියල් 250,000 දක්වා අත්තනෝමතික ලෙස අඩු කිරීම රජයේ තීරණ හෑල්ලුවට ලක් කිරීමක් බව එම සංගමය පෙන්වා දෙයි.මෙම පවතින ගැටලුවලට කඩිනම් විසඳුම් ලබා දීමට බලධාරීන් අපොහොසත් වන්නේ නම්, තමන්ට හිමි නීත්යානුකූල අයිතීන් අනුව දැඩි වෘත්තීය ක්රියාමාර්ගයකට එළඹෙන බවට දුම්රිය ස්ථානාධිපති සංගමය රජයට අනතුරු අඟවා සිටියි. පවතින අර්බුදකාරී තත්ත්වය හමුවේ ඉදිරියේදී සිදුවිය හැකි ඕනෑම වෘත්තීය සමිති ක්රියාමාර්ගයක් සඳහා පරිපාලනයේ අත්තනෝමතික පිළිවෙත් හේතුවන බව ද එම නිවේදනයේ වැඩිදුරටත් සඳහන් වේ.
දුම්රිය ස්ථානාධිපතිවරුන්ගෙන් දැඩි වෘත්තීය සමිති අනතුරු ඇඟවීමක්
