ශ්රී ලංකා මුහුදු සීමාවේදී දේශීය ධීවර යාත්රා දෙකකට එල්ල වූ ප්රහාරය සම්බන්ධයෙන් රජය පුළුල් මට්ටමේ පරීක්ෂණයක් ආරම්භ කර ඇති බව ධීවර නියෝජ්ය අමාත්ය රත්න ගමගේ මහතා අවධාරණය කරයි. හික්කඩුව ප්රාදේශීය ලේකම් කාර්යාලයේ පැවැති නිල හමුවකදී අදහස් දක්වමින් ඔහු කියා සිටියේ, මෙම සිදුවීම පිළිබඳව වගකිවයුතු රජයක් ලෙස අදාළ සියලු අංශ දැනුවත් කර ඇති බවයි. විශේෂයෙන්ම ශ්රී ලංකා නාවික හමුදාව සහ විදේශ කටයුතු අමාත්යාංශය ඒකාබද්ධව මේ පිළිබඳ කරුණු සොයා බලන ලෙස අමාත්යාංශය මගින් නිල වශයෙන් උපදෙස් ලබා දී තිබේ.මෙම ප්රහාරය එල්ල වූ අවස්ථාවේදී එය ඉන්දීය වෙරළාරක්ෂක බලකාය විසින් සිදුකළ බවට සැක පළ වුවද, ඉන්දීය මහ කොමසාරිස් කාර්යාලය නිවේදනයක් නිකුත් කරමින් එම චෝදනා ප්රතික්ෂේප කර ඇත. ඉන්දීය නාවික හමුදාව හෝ වෙරළාරක්ෂක බළකාය මෙම සිදුවීමට කිසිදු සම්බන්ධයක් නොමැති බව ඔවුන් දන්වා තිබේ. කෙසේ වෙතත්, අමාත්යවරයා පෙන්වා දෙන්නේ අසල්වැසි රටක නිල පාර්ශවයන් එම ප්රකාශය කළද, සත්ය තත්ත්වය හෙළි කර ගැනීම සඳහා ස්වාධීන පරීක්ෂණ අඛණ්ඩව ක්රියාත්මක කරන බවයි.ධීවර ප්රජාවගේ ආරක්ෂාව තහවුරු කිරීම රජයේ ප්රමුඛතම වගකීමක් බව පෙන්වා දුන් නියෝජ්ය අමාත්යවරයා, මෙම ප්රහාරය එල්ල කළේ විදේශීය කණ්ඩායමක්ද, දේශීය පිරිසක්ද නැතිනම් වෙනත් සංවිධානාත්මක කල්ලියක්ද යන්න පිළිබඳව නිවැරදි වාර්තාවක් අපේක්ෂා කරන බව ප්රකාශ කළේය. පොලිසිය සහ ආරක්ෂක අංශ මගින් සිදුකරන විමර්ශනවලින් අනතුරුව ප්රහාරයේ ස්වභාවය සහ වගකිවයුත්තන් පිළිබඳව නිශ්චිත තොරතුරු රටට අනාවරණය කරන බවද ඔහු වැඩිදුරටත් සහතික විය.
ධීවර යාත්රාවලට එල්ල වූ ප්රහාරය: රජයෙන් විශේෂ විමර්ශනයක්
