නොරොච්චෝලය ලක්විජය ගල්අඟුරු බලාගාරයේ පද්ධති කිහිපයක ඇති වී තිබෙන කාර්මික දෝෂ හේතුවෙන් එහි විදුලි උත්පාදන කටයුතුවලට දැඩි බලපෑම් එල්ල වී ඇති බව පාර්ලිමේන්තුවේදී අනාවරණය විය. විශේෂයෙන්ම බලාගාරයේ ගල්අඟුරු ඇඹරුම් යන්ත්ර (Coal Crushers) දෙකක් මේ වන විට සම්පූර්ණයෙන්ම අක්රිය වී ඇති අතර, මේ හේතුවෙන් එක් ජනන යන්ත්රයක නිෂ්පාදන ධාරිතාව සැලකිය යුතු ලෙස පහත වැටී ඇති බව සඳහන් වේ.බලාගාරයේ පවතින මෙම තත්ත්වය හමුවේ පරිසරයට මුදාහැරෙන ධූමල ප්රමාණය අසාමාන්ය ලෙස ඉහළ ගොස් ඇති බවට විපක්ෂ මන්ත්රීවරුන් කරුණු පෙන්වා දෙයි. බලාගාරයේ චිමිනියෙන් අධික ලෙස කළු දුමාරයක් නිකුත් වෙමින් පවතින බවත්, එමඟින් අවට ප්රදේශයේ ජනතාවට සහ පරිසරයට දැඩි බලපෑමක් එල්ල වෙමින් පවතින බවත් එහිදී අවධාරණය කෙරිණි.මෙම අර්බුදයට ප්රධානතම හේතුව ලෙස මන්ත්රීවරුන් පෙන්වා දෙන්නේ බලාගාරය සඳහා ප්රමිතියෙන් තොර බාල ගල්අඟුරු භාවිත කිරීමයි. බාල ගල්අඟුරු දහනය කිරීමේදී ඇති වන තාක්ෂණික ගැටලු හේතුවෙන් එක් බලාගාර පද්ධතියක කටයුතු පවා තාවකාලිකව නතර කිරීමට පාලනාධිකාරියට සිදුව ඇති බව වාර්තා වේ.තවද, දුමාරය පාලනය කිරීම සඳහා බලාගාරයේ ස්ථාපිත කර තිබූ පෙරහන් පද්ධතිය (Filter System) ඉවත් කර ඇති බවටද බරපතළ චෝදනාවක් එල්ල වී තිබේ. මෙම පෙරහන් පද්ධතිය ක්රියාත්මක නොවීම නිසා කිසිදු පාලනයකින් තොරව විෂ දුමාරය වායුගෝලයට මුදාහැරෙන බවත්, ඒ හේතුවෙන් සමස්ත කලාපයම දුමාරයෙන් වැසී ගොස් ඇති බවත් සභාවේදී ප්රකාශ විය.මෙම තාක්ෂණික බිඳවැටීම් සහ පරිසර හානිය සම්බන්ධයෙන් බලධාරීන් වහාම අවධානය යොමු කළ යුතු බව මන්ත්රීවරුන් වැඩිදුරටත් ඉල්ලා සිටියහ. ජාතික විදුලි පද්ධතියට විශාල දායකත්වයක් සපයන මෙම බලාගාරය නිසි නඩත්තුවකින් තොරව පවත්වාගෙන යාම ඉදිරි විදුලි සැපයුමටද තර්ජනයක් විය හැකි බව ඔවුන්ගේ අදහසයි.
නොරොච්චෝලයෙන් කළු දුම්: යන්ත්ර බිඳවැටීමෙන් විදුලි උත්පාදනයටත් බාධා
