නොරොච්චෝල පොලිස් වසමේ නාවක්කාඩුව ප්රදේශයෙන් ඊයේ (දෙසැම්බර් 3) රාත්රියේ ද්විත්ව මනුෂ්ය ඝාතනයක් සහ තවත් කාන්තාවකට බරපතළ තුවාල සිදු කිරීමේ සිද්ධියක් වාර්තා වේ. තියුණු ආයුධයකින් එල්ල කළ ප්රහාරයක් හේතුවෙන් බරපතළ තුවාල ලැබූ පිරිමි පුද්ගලයෙකු සහ කාන්තාවන් දෙදෙනෙකු පුත්තලම රෝහලට ඇතුළත් කිරීමෙන් පසු, පිරිමි පුද්ගලයා සහ එක් කාන්තාවක් මෙලෙස ජීවිතක්ෂයට පත්ව ඇත.මියගිය පිරිමි පුද්ගලයා වයස අවුරුදු 38ක් වන අතර, මියගිය කාන්තාව වයස අවුරුදු 35කි. ඔවුන් දෙදෙනාම නාවක්කාඩුව ප්රදේශයේ පදිංචිකරුවන් බව පොලීසිය තහවුරු කර ඇත. මෙම ඛේදජනක සිදුවීමට හේතුව පුද්ගලික ආරවුලක් බවට මේ වන විට සිදුකෙරෙන විමර්ශනවලදී අනාවරණය වී තිබේ.මෙම අපරාධය සම්බන්ධයෙන් සැකකරන නාවක්කාඩුව ප්රදේශයේම පදිංචි වයස අවුරුදු 23ක් වන පුද්ගලයා පොලීසිය විසින් අත්අඩංගුවට ගෙන ඇත. ඔහු ද මේ වන විට ප්රතිකාර සඳහා පුත්තලම රෝහලට ඇතුළත් කර ඇති අතර, පොලිස් ආරක්ෂාව යටතේ සිටින බව වාර්තා වේ.සිද්ධිය සම්බන්ධයෙන් වැඩිදුර විමර්ශන නොරොච්චෝල පොලීසිය විසින් සිදු කරනු ලබන අතර, මියගිය අයගේ මරණ පරීක්ෂණ කටයුතු ද මේ වන විට ක්රියාත්මක වෙමින් පවතී.
නොරොච්චෝලේ ද්විත්ව ඝාතනයක්: සැකකරු රෝහල් ගතව පොලිස් අත්අඩංගුවේ
