ජේසුස් ක්රිස්තුස් වහන්සේ මරණය පරාජය කරමින් ලැබූ උත්ථානය සිහිපත් කරන උතුම් පාස්කු දිනය නිමිත්තෙන් අග්රාමාත්ය ආචාර්ය හරිනි අමරසූරිය මහත්මිය සිය සුබ පැතුම් පිරිනමා තිබේ. අඳුර පරදා ආලෝකයත්, බිය පරදා විශ්වාසයත් ජයගත හැකි බව පසක් කරන මෙම දිනය, සමස්ත මානව වර්ගයාටම බලාපොරොත්තුවේ පණිවිඩය රැගෙන එන බව අග්රාමාත්යවරිය පෙන්වා දෙයි.ඕනෑම අඳුරු රාත්රියකට පසු අනිවාර්යයෙන්ම හිරු උදාවන බව සිහිපත් කරන අග්රාමාත්යවරිය, ජීවිතයට පැමිණෙන බාධක හා අභියෝග හමුවේ නොසැලී ඉදිරියට යාමට පාස්කු පණිවිඩය මහඟු දිරියක් වන බව සඳහන් කරයි. අත්නොහරින අධිෂ්ඨානයෙන් යුතුව අලුත් ගමනක් ආරම්භ කිරීමට මෙම ආගමික උත්සවය අපව දිරිමත් කරන බව ඇයගේ විශ්වාසයයි.ලෝක සාමය පිළිබඳව සිය අවධානය යොමු කරමින් අග්රාමාත්යවරිය කියා සිටින්නේ, මැදපෙරදිග පවතින අවාසනාවන්ත යුදමය වාතාවරණය හේතුවෙන් පීඩාවට පත් ජනතාව අමතක නොකළ යුතු බවයි. වෛරය සහ ගැටුම් වෙනුවට සාකච්ඡාව සහ අන්යෝන්ය අවබෝධය රජයන, යුද බියෙන් තොර සාමකාමී ලෝකයක් උදාවීම මෙවර ඇයගේ ප්රධාන ප්රාර්ථනාව වී තිබේ.ශ්රී ලාංකිකයන් ලෙස අප සියලු භේදයන් පසෙකලා, සහෝදරත්වයෙන් හා ප්රේමයෙන් පිරි එක් මානව පවුලක් ලෙස අත්වැල් බැඳගත යුතු බව අග්රාමාත්යවරිය අවධාරණය කරයි. ඉවසීම සහ සමාව දීමේ උදාර ගුණයෙන් අපගේ හදවත් පෝෂණය කර ගැනීම තුළින් යහපත් රටක් ගොඩනැඟීමේ අරමුණ කරා පහසුවෙන් ගමන් කළ හැකි බව ඇය සිය පණිවිඩය මගින් පෙන්වා දෙයි.ක්රිස්තුස් වහන්සේ ලොවට දායාද කළ ප්රේමයේ සහ සහජීවනයේ පණිවිඩය පෙරදැරි කරගෙන, වඩාත් සාධාරණ සහ සාමකාමී සමාජයක් උදෙසා කැපවීමට අග්රාමාත්ය ආචාර්ය හරිනි අමරසූරිය මහත්මිය මෙහිදී සියලු ජනතාවට ඇරයුම් කර සිටියි.
බලාපොරොත්තුවේ අරුණෝදය කරා එක්වෙමු – අගමැතිනියගෙන් පාස්කු පණිවිඩයක්!
