මත්ද්රව්ය ජාලය මුලිනුපුටා දැමීමේ අරමුණින් දිවයින පුරා ක්රියාත්මක වන “රටම එකට” ජාතික මෙහෙයුම් මාලාව යටතේ ඊයේ (06) දිනයේදී පමණක් සැකකරුවන් 777 දෙනෙකු අත්අඩංගුවට ගැනීමට පොලිසිය සමත් විය. මත්ද්රව්ය සැපයුම අඩාල කිරීම සහ ඉල්ලුම පාලනය කිරීම වෙනුවෙන් දියත් කළ මෙම විශේෂ වැටලීම් 762ක ප්රතිඵලයක් ලෙස හෙරොයින්, අයිස් සහ ගංජා ඇතුළු තහනම් මත්ද්රව්ය රැසක් පොලිස් භාරයට ගෙන තිබේ.මෙහිදී පොලිස් නිලධාරීන් විසින් සිදුකළ සෝදිසි කිරීම්වලදී හෙරොයින් ග්රෑම් 434ක් සහ අයිස් මත්ද්රව්ය ග්රෑම් 477ක් සොයාගෙන ඇති අතර, ඊට අමතරව ගංජා කිලෝ 5කට අධික ප්රමාණයක් සහ කොකේන් ස්වල්පයක්ද අත්අඩංගුවට ගත් ද්රව්ය අතර වේ. මත්ද්රව්ය ජාවාරම්කරුවන්ට එරෙහිව දැඩිව නීතිය ක්රියාත්මක කරමින්, හඳුනාගත් සැකකරුවන් 15 දෙනෙකු සම්බන්ධයෙන් රැඳවුම් නියෝග ලබාගෙන වැඩිදුර ප්රශ්න කිරීම් ආරම්භ කර ඇත.මෙම මෙහෙයුමේ සුවිශේෂී ලක්ෂණයක් වන්නේ මත්ද්රව්ය ජාවාරම හරහා උපයාගත් නීති විරෝධී වත්කම් පිළිබඳවද විමර්ශන ආරම්භ කිරීමයි. ඒ අනුව සැකකරුවන් 09 දෙනෙකුගේ දේපළ හා වත්කම් සම්බන්ධයෙන් විශේෂ පරීක්ෂණ දැනටමත් ක්රියාත්මක වන බව පොලිස් මූලස්ථානය සඳහන් කරයි. මත්ද්රව්යවලින් උපයන මුදල් ජාලය බිඳ දැමීම මෙහි මූලික අරමුණ වී තිබේ.අත්අඩංගුවට ගත් පිරිස අතරින් මත්ද්රව්යවලට දැඩි ලෙස ඇබ්බැහි වූවන් හඳුනාගෙන, ඔවුන් පුනරුත්තාපනය සඳහා යොමු කිරීමටද පියවර ගෙන ඇත. ඒ අනුව පුද්ගලයින් 19 දෙනෙකු පුනරුත්තාපන මධ්යස්ථාන වෙත යොමු කර ඇති අතර, රට පුරා මෙවැනි වැටලීම් ඉදිරියටත් දැඩිව ක්රියාත්මක කරන බව පොලීසිය අවධාරණය කරයි.
මත්කුඩු ජාවාරමට එරෙහිව ‘රටම එකට’ මෙහෙයුම සැර වෙයි: සැකකරුවන් 777ක් දැලට!
