පාර්ලිමේන්තු සභා ගර්භය තුළ මන්ත්රීවරියන් ඉලක්ක කරගනිමින් සිදුකෙරෙන වාචික හිංසනයන් සහ අපහාසාත්මක ප්රකාශ වැළැක්වීම සඳහා පියවර ගන්නා ලෙස පාර්ලිමේන්තු මන්ත්රීවරියන්ගේ සංසදය කථානායකවරයාගෙන් නිල ඉල්ලීමක් කර ඇත. වත්මන් පාර්ලිමේන්තුවේ ස්ථාවර නියෝග සංශෝධනය කරමින් මෙම තත්ත්වය පාලනය කිරීමට අවශ්ය නීතිමය රාමුව සකස් කරන ලෙස එම සංසදය අවධාරණය කරයි.අමාත්ය සරෝජා සාවිත්රි පෝල්රාජ් මහත්මිය ඇතුළු මන්ත්රීවරියන් පිරිසකගේ අත්සනින් යුතුව ඉදිරිපත් කළ මෙම යෝජනාව මගින් පෙන්වා දෙන්නේ, මෑත කාලීනව සභා ගර්භය තුළ කාන්තාවන්ට එරෙහිව එල්ල වන වාචික ප්රහාරයන්හි පැහැදිලි වර්ධනයක් දක්නට ලැබෙන බවයි. මෙය හුදෙක් පෞද්ගලික මට්ටමේ ගැටලුවක් නොව, සමස්ත පාර්ලිමේන්තු පද්ධතියේ ගෞරවයට හානිකර තත්ත්වයක් බව ඔවුහු පෙන්වා දෙති.මෙවැනි හැසිරීම් හරහා ජනතාවගේ ස්වාධිපත්ය බලය මෙන්ම, කාන්තාවන්ට දේශපාලනයට අවතීර්ණ වීමට සහ නිදහසේ අදහස් ප්රකාශ කිරීමට ඇති අයිතිය බරපතළ ලෙස උල්ලංඝනය වන බව මන්ත්රීවරියන්ගේ සංසදය පවසයි. මෙය ප්රජාතන්ත්රවාදී වටිනාකම්වලට එල්ල කරන අභියෝගයක් ලෙස ද එම ලිපිය මගින් විග්රහ කර තිබේ.තවද, පාර්ලිමේන්තුව වැනි උත්තරීතර ආයතනයක් තුළ සිදුවන මෙවැනි අයහපත් හැසිරීම් සමාජයට ඉතා අහිතකර පූර්වාදර්ශ සපයන බව පාර්ලිමේන්තු සන්නිවේදන අංශය නිකුත් කළ නිවේදනයේ සඳහන් වේ. විශේෂයෙන්ම, කාන්තාවන්ගේ ක්රියාකාරී දේශපාලන සහභාගීත්වය අධෛර්යමත් කිරීමට මෙවැනි වාතාවරණයක් සෘජුවම බලපාන බව ඔවුහු පෙන්වා දෙති.සංසදය යෝජනා කරන්නේ මන්ත්රීවරුන් හෝ මන්ත්රීවරියන් යන දෙපාර්ශ්වයම විසින් අනෙක් පාර්ශ්වයේ ගෞරවයට හානි වන ආකාරයේ ප්රකාශ හෝ හැසිරීම්වලින් වැළකී සිටිය යුතු බවයි. මෙම රීතිය ස්ථාවර නියෝගවල “පාර්ලිමේන්තුව තුළ විනය” යන කොටසට අලුතින් එක් කිරීම හරහා වඩාත් ශක්තිමත් විනය පාලනයක් ඇති කළ හැකි බව ඔවුන්ගේ විශ්වාසයයි.මේ අනුව, පවතින නීතිමය හිඩැස් පුරවමින් නව ස්ථාවර නියෝගයක් හඳුන්වා දීමට කටයුතු කරන ලෙසත්, ඒ හරහා මන්ත්රීවරියන්ගේ ආරක්ෂාව සහ අභිමානය තහවුරු කරන ලෙසත් මන්ත්රීවරියන්ගේ සංසදය කථානායකවරයාගෙන් වැඩිදුරටත් ඉල්ලා සිටියි.
මන්ත්රීවරියන්ට එරෙහි වාචික හිංසනය වැළැක්වීමට ස්ථාවර නියෝග සංශෝධනයක්
