අදට (05) යෙදී ඇති උතුම් පාස්කු ඉරිදා දිනය වෙනුවෙන් පණිවිඩයක් නිකුත් කරමින් ජනාධිපති අනුර කුමාර දිසානායක මහතා සමස්ත කිතුනු ජනතාව වෙත සිය සුබ පැතුම් පිරිනමා තිබේ. මරණය පරදා ජේසුස් ක්රිස්තුස් වහන්සේ ලැබූ උත්ථානය තුළින් විදහා දැක්වෙන බලාපොරොත්තුව සහ නව ජීවනය මෙවර පාස්කු පණිවිඩයේ ප්රධාන තේමාව වී ඇත.ජනාධිපතිවරයා පෙන්වා දෙන්නේ පාස්කු උත්සවය යනු හුදෙක් ආගමික උත්සවයක් පමණක් නොව, මනුෂ්යත්වය, ප්රේමය සහ දරාගැනීමේ ශක්තිය පිළිබඳව ලොවට මෙනෙහි කරවන සංස්කෘතික මංගල්යයක් බවයි. ඕනෑම අභියෝගාත්මක අඳුරු යුගයක් අවසානයේ ආලෝකය ජයගත හැකි බව උත්ථාන වීමේ ජීවනාදර්ශය මගින් පසක් කරන බව ඔහු සඳහන් කරයි.මෙහිදී විශේෂයෙන්ම වත්මන් ලෝක තත්ත්වය පිළිබඳව අවධානය යොමු කර ඇති ජනාධිපතිවරයා, මැදපෙරදිග කලාපයේ පවතින දරුණු යුදමය වාතාවරණය හේතුවෙන් ලෝවැසි ජනතාව විඳින පීඩාව පිළිබඳව සිය කණගාටුව පළ කර සිටියි. එදිරිවාදිකම් වෙනුවට සාමය සහ සහජීවනය පතන ජනතාවගේ ප්රාර්ථනාවන් මේ උතුම් දින සැබෑ වේවායි ඔහු පතයි.සියලු ශ්රී ලාංකිකයන්ට ආරාධනා කරමින් ජනාධිපතිවරයා පවසන්නේ, ක්රිස්තුස් වහන්සේගේ ඉගැන්වීම්වලට අනුව අපගේ හදවත් ප්රේමයෙන් සහ ඉවසීමෙන් පුරවා ගත යුතු බවයි. ජාති හෝ ආගම් භේදවලින් තොරව එකම ශ්රී ලාංකික පවුලක් ලෙස ඉදිරියට ගමන් කිරීමට මෙය සුදුසුම කාලය බව ඔහු අවධාරණය කරයි.සමාව දීමේ උතුම් ගුණය පෙරදැරි කරගනිමින්, එක මවකගේ දරුවන් මෙන් සහෝදරත්වයෙන් අත්වැල් බැඳගැනීම රටේ අනාගත අභිවෘද්ධියට අත්යවශ්ය කරුණක් බව ජනාධිපතිවරයා සිය පණිවිඩය මගින් වැඩිදුරටත් සිහිපත් කර දී තිබේ.දුකට පත් ජනතාවගේ ගැලවීම උදෙසා සිය ජීවිතය කැප කළ ක්රිස්තුස් වහන්සේ මරණයේ අඳුර පරාජය කළාක් මෙන්, අප සැම ද අධිෂ්ඨානයෙන් යුතුව යහපත් සමාජයක් ගොඩනැඟීමට කැපවිය යුතු බව මෙහිදී සඳහන් වේ.අවසාන වශයෙන්, ශ්රී ලංකාවාසී මෙන්ම ලෝවැසි සියලු කිතුනු බැතිමතුන් වෙත දයාව සහ සාමය පිරි සුබ පාස්කු මංගල්යයක් වේවායි ජනාධිපති අනුර කුමාර දිසානායක මහතා සිය හෘදයාංගම සුබ පැතුම් එක් කර ඇත.
මනුෂ්යත්වයේ සහෝදරත්වයට ජනපතිගෙන් පාස්කු ඇරයුමක්!
