සමගි සේවක සංගමයේ 6 වැනි සංවත්සරය සනිටුහන් කරමින් පැවැති මාධ්ය හමුවේදී අදහස් දක්වමින් සමගි ජන බලවේගයේ මහ ලේකම් පාර්ලිමේන්තු මන්ත්රී රංජිත් මද්දුමබණ්ඩාර මහතා අවධාරණය කළේ, වත්මන් පාලනය වැඩකරන ජනතාව දිනෙන් දින දැඩි පීඩාවකට පත්කරමින් සිටින බවයි. යහපාලන රජය සමයේ ජනතාවට හිමිවූ සහන වර්තමානය වන විට අහිමි කර ඇති බවත්, ගුරු වැටුප් වැඩි කිරීම ඇතුළු පොරොන්දු ඉටු නොකර රජයේ ආයතන ප්රතිව්යුහගතකරණය නාමයෙන් විකුණා දැමීමට රජය උත්සාහ කරන බවත් ඔහු පෙන්වා දුන්නේය.ඉන්ධන මිල අසාධාරණ ලෙස ඉහළ දැමීම හරහා රජය ජනතාවගෙන් අධික ලාභයක් උපයන බවට මහ ලේකම්වරයා මෙහිදී චෝදනා කළේය. දින 40කට ප්රමාණවත් තෙල් තොග අඩු මිලට ගෙන තිබියදී, මැදපෙරදිග යුද තත්ත්වය අයුතු ලෙස ප්රයෝජනයට ගනිමින් මිල ඉහළ දැමීම හේතුවෙන් ඉදිරියේදී විදුලි බිල සියයට 30කින් පමණ වැඩි වීමේ අවදානමක් පවතින බව ඔහු සඳහන් කළේය. මෙම ක්රියාවලිය නිසා අත්යවශ්ය භාණ්ඩ හා ආහාර මිල ගණන් දරාගත නොහැකි ලෙස ඉහළ යන බවද මන්ත්රීවරයා ප්රකාශ කළේය.රටේ දූෂණය සහ වංචාව ඉහළ ගොස් ඇති බව පෙන්වා දුන් ඔහු, ගල්අඟුරු වංචාව හේතුවෙන් මෙරටට ඩොලර් බිලියන 10ක පමණ දැවැන්ත පාඩුවක් සිදුවී ඇති බව පැවසීය. විදුලිබල අමාත්යවරයාට එරෙහිව අල්ලස් කොමිසම නඩු පවරා ඇති පසුබිමක, රජයේ ප්රතිපත්තියක් නොමැති ක්රියාකලාපයට එරෙහිව බලශක්ති අමාත්යවරයාට සහ අග්රාමාත්යවරයාට එරෙහිව විශ්වාසභංග යෝජනා දෙකක් කඩිනමින් පාර්ලිමේන්තුවට ඉදිරිපත් කරන බවද මන්ත්රීවරයා මෙහිදී අනාවරණය කළේය.පැල්වත්ත සහ සෙවණගල සීනි සමාගම් පෞද්ගලීකරණයට ගෙන යන උත්සාහය හෙළා දකිමින් ඔහු කියා සිටියේ, එම ආයතනවල ගොවීන්ට හිමිවිය යුතු ගෙවීම් පවා මෙතෙක් සිදුකර නොමැති බවයි. එමෙන්ම යුද සමයේ රට වෙනුවෙන් සේවය කළ සිවිල් ආරක්ෂක නිලධාරීන්ගේ සුබසාධනය නොසලකා හරිමින් ඔවුන්ව අසරණ කිරීමට රජය කටයුතු කර ඇති බවත්, ඔවුන්ට වහාම සාධාරණය ඉටුකළ යුතු බවත් ඔහු අවධාරණය කළේය.අවසාන වශයෙන්, සියයට 18ක වැට් බද්ද වහාම ඉවත් කර ජනතාවට සහන සලසන ලෙස රජයට බල කළ මද්දුමබණ්ඩාර මහතා, රටේ අපරාධ රැල්ල සහ පාතාල ක්රියාකාරකම් මර්දනය කිරීමට පාලකයින් අසමත් වී ඇති බවද පැවසීය. රට නිසි මාවතකට ගැනීමට නම් දක්ෂ කණ්ඩායමක් අවශ්ය බවත්, එක්සත් ජාතික පක්ෂය සමඟ එක්වීම පිළිබඳව සුදුසු වේලාවකදී තීරණය කරන බවත් ඔහු වැඩිදුරටත් ප්රකාශ කර සිටියේය.
රජයේ අසාධාරණ තීරණවලට එරෙහිව විශ්වාසභංග දෙකක්: වැඩකරන ජනතාව වෙනුවෙන් සජබ පෙරමුණට!
