ජනාධිපතිවරයා ඊයේ පාර්ලිමේන්තුවේදී සිදුකළ ප්රකාශය සම්බන්ධයෙන් පූජ්ය බළන්ගොඩ කස්සප හිමියන් සිය දැඩි විවේචනය එල්ල කරති. ඉරාන නෞකාවකට මෙරටට පැමිණීමට අවසර නොදීම සහ ඇමරිකානු ප්රහාරක යානා සම්බන්ධයෙන් ජනාධිපතිවරයා කළ ප්රකාශ මධ්යස්ථ ප්රතිපත්තියක් පෙන්වීමට දැරූ උත්සාහයක් බව උන්වහන්සේ පවසති. කෙසේ වෙතත්, මෙරට සමීප මිතුරෙකු වන ඉරානය වැනි රටවල් අමනාප කරගනිමින් ආණ්ඩුව අනුගමනය කරන ඇමරිකානු ගැති පිළිවෙත හේතුවෙන් ඉදිරියේදී මෙරටට අහිතකර බලපෑම් එල්ල විය හැකි බවත්, අත්දැකීම් නොමැති පාලකයන් අතට රට පත්වීම නිසා ජනතාව අද දුක් විඳින බවත් උන්වහන්සේ වැඩිදුරටත් සඳහන් කළහ.ඉන්ධන මිල ඉහළ යාම සහ නෞකා පැමිණීම පිළිබඳව ජනාධිපතිවරයා පාර්ලිමේන්තුවේදී “බ්රේකින් නිවුස්” කීම හාස්යයට කරුණක් බව පවසන කස්සප හිමියන්, ජනාධිපතිවරයා තෙල් සංස්ථාවේ සභාපතිවරයා හෝ මාධ්ය ප්රකාශකවරයා ලෙස කටයුතු කරන්නේදැයි ප්රශ්න කර සිටිති. තෙල් මිල ඉහළ දැමීමට පමණක් ආණ්ඩුවක් අවශ්ය නොවන බවත්, බලයට පත්වීමට පෙර ජනතාවට ලබා දුන් පොරොන්දු අමතක කර අද වන විට ජනතාව පීඩාවට පත් කරමින් සිටින බවත් උන්වහන්සේ චෝදනා කරති. වර්තමාන පාලනය යටතේ ජනතාව මුහුණ දෙන ඉන්ධන පෝලිම් ඇතුළු සියලු දුක් ගැහැටවලට ජනාධිපතිවරයා වගකිව යුතු බව උන්වහන්සේ අවධාරණය කළහ.ආර්ථික මුහුදු කලාපය සාම කලාපයක් ලෙස පැවතිය යුතු වුවද, පවතින දේශපාලන තීරණ හමුවේ රටේ ස්වෛරීභාවයට පවා තර්ජන එල්ල වී ඇති බව උන්වහන්සේ පෙන්වා දෙති. විශේෂයෙන්ම ගල් අඟුරු ටෙන්ඩරය පවා ඉන්දියානු සමාගමකට ලබා දීම වැනි ක්රියාමාර්ග හරහා රටේ සම්පත් පාලනය වන ආකාරය පිළිබඳව උන්වහන්සේ සිය කනස්සල්ල පළ කළහ. පෝසත් රටක් ගොඩනඟන බව පවසා බලයට පැමිණි පාලකයන් අද වන විට රට අරාජිකත්වයට ඇද දමමින් සිටින බව පූජ්ය බළන්ගොඩ කස්සප හිමියන් මාධ්ය හමුවේ වැඩිදුරටත් ප්රකාශ කර සිටියහ.
”රට කරවන්නේ කිරිසප්පයන්ද?” – ජනපතිගේ පාර්ලිමේන්තු ප්රකාශයට පූජ්ය බළන්ගොඩ කස්සප හිමිගෙන් සැර පිළිතුරක්!
