රාජ්‍ය සේවය ඩිජිටල්කරණයට සහ බලශක්ති අරපිරීකම උදෙසා නව තීරණ රැසක්

මෑතකාලීන මැදපෙරදිග අර්බුදය හමුවේ මතුව ඇති බලශක්ති අභියෝග ජයගනිමින් රාජ්‍ය යාන්ත්‍රණය බිඳවැටීමකින් තොරව පවත්වාගෙන යාම සඳහා පත්කළ අමාත්‍ය මණ්ඩල කමිටුව තෙවන වරටත් රැස්විය. අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් මාර්ගගත ක්‍රමවේදය (Online) ඔස්සේ පැවති මෙම සාකච්ඡාවේදී, ඉන්ධන සහ විදුලිය කළමනාකරණය කරමින් පොදු සේවා අඛණ්ඩව සැපයීම සඳහා පසුගිය කාල සීමාව තුළ ගනු ලැබූ ක්‍රියාමාර්ගවල ප්‍රගතිය සවිස්තරාත්මකව විමසා බලන ලදී.​බලශක්ති සංරක්ෂණ ක්‍රියාවලිය තුළ සෞඛ්‍ය හා ජනමාධ්‍ය අමාත්‍යාංශය මාර්තු මස අවසානය වන විට 42% ක ඩීසල් ඉතිරියක් අත්පත් කරගනිමින් කැපී පෙනෙන සාර්ථකත්වයක් පෙන්වා ඇති බව මෙහිදී අනාවරණය විය. මීට අමතරව, පාසල් සිසුන් බලශක්ති කළමනාකරණය සඳහා දැනුවත් කිරීමේ වැඩසටහන් අප්‍රේල් මස මුල් සතියේදී ක්‍රියාත්මක කිරීමටත්, විශ්වවිද්‍යාල අධ්‍යයන කටයුතු හැකිතාක් දුරට මාර්ගගත ක්‍රමයට සිදු කිරීමටත් තීරණය කර ඇත. එසේම, ග්‍රාම නිලධාරී විභාගය ඇතුළු අත්‍යාවශ්‍ය විභාග කටයුතු සැලසුම් කළ පරිදි බාධාවකින් තොරව පවත්වා ඇති බවද තහවුරු විය.​රාජ්‍ය සේවයේ කාර්යක්ෂමතාව ඉහළ නැංවීම සඳහා ඩිජිටල් තාක්ෂණය භාවිත කිරීම කෙරෙහි මෙහිදී විශේෂ අවධානයක් යොමු විය. ඒ අනුව, අප්‍රේල් 16 සහ 17 යන දිනවල නිවසේ සිට රාජකාරී කිරීමේ (Work from Home) හැකියාව පිළිබඳව සොයා බැලෙන අතර, ඩිජිටල් ආර්ථික අමාත්‍යාංශය විසින් සකස් කරන ලද නව මාර්ගෝපදේශ ඇතුළත් චක්‍රලේඛය අප්‍රේල් 20 වන දිනට පෙර නිකුත් කිරීමට නියමිතය. මෙම වැඩපිළිවෙළට ස්වාධීන කොමිෂන් සභාවල සහභාගිත්වය ලබා ගැනීමටද, අත්‍යාවශ්‍ය සේවක පිරිස් පමණක් කාර්යාල වෙත කැඳවීමටද අදාළ අංශ එකඟතාව පළ කර ඇත.​ස්වාභාවික සම්පත් සුරැකීම සම්බන්ධයෙන්ද මෙහිදී වැදගත් තීන්දු කිහිපයක් ගනු ලැබූ අතර, විශේෂයෙන් ජල පරිභෝජනය සීමා කිරීම සහ විකල්ප ජල මූලාශ්‍ර භාවිතය පිළිබඳව මහජනතාව දැනුවත් කිරීමේ කටයුතු ‘ක්ලීන් ශ්‍රී ලංකා’ වැඩසටහන සමඟ ඒකාබද්ධව ක්‍රියාත්මක කිරීමට තීරණය විය. තවද, රාජ්‍ය ආයතනවල දෛනික බලශක්ති සංචිත සහ සේවක පැමිණීම වැනි තීරණාත්මක දත්ත සජීවීව නිරීක්ෂණය කළ හැකි ‘Dashboard’ පද්ධතියක් හරහා අධීක්ෂණය කිරීමට පියවර ගැනීම රාජ්‍ය පරිපාලනයේ නවීන ප්‍රවේශයක් ලෙස හඳුනාගත හැකිය.​මෙම තීරණාත්මක සාකච්ඡාව සඳහා විවිධ අමාත්‍යාංශවල ලේකම්වරුන්, ජනාධිපති ලේකම් ඇතුළු ඉහළ පෙළේ නිලධාරීන් රැසක් සම්බන්ධ වූ අතර, ඔවුන් ලබාදෙන ප්‍රගති වාර්තා මත පදනම්ව මීළඟ කමිටු වාරයේදී ඉදිරි පියවර ගැනීමට නියමිතය. සමස්තයක් ලෙස, බලශක්ති අර්බුදයට මුහුණ දෙන අතරතුර රාජ්‍ය සේවය නවීකරණය කිරීම සහ අනවශ්‍ය වියදම් අවම කරගැනීම රජයේ මූලික අරමුණ වී තිබේ.