ලොව පුරා සංචාරකයින් වඩාත් සතුටින් සංචාරය කරන ගමනාන්ත 10 අතරට ශ්රී ලංකාව තේරී පත්ව ඇති බව ‘USA Today’ පුවත්පත ප්රකාශයට පත් කළ අලුත්ම වාර්තාවක දැක්වේ. 2026 වසරේ සංචාරය කිරීමට අපේක්ෂා කරන රටවල් කිහිපයක පුද්ගලයින් 8,000කට අධික පිරිසක් යොදාගනිමින් ‘G Adventures’ ආයතනය විසින් පවත්වන ලද සමීක්ෂණයකට අනුව මෙම ශ්රේණිගත කිරීම සිදු කර ඇත. මෙහි විශේෂත්වය වන්නේ සංචාරකයින්ගෙන් සියයට 89ක්ම පවසා ඇත්තේ අරමුණක් සහිත සංචාරයන් තමන්ගේ දිගුකාලීන සතුටට බෙහෙවින් ඉවහල් වන බවයි.ශ්රී ලංකාවේ දකුණු වෙරළ තීරය ආශ්රිතව කැටමරන් යාත්රාවක නැගී සිදුකරන දින හතක සුවිශේෂී මුහුදු සංචාරය මෙම ඇගයීමට ප්රධාන වශයෙන්ම හේතු වී තිබේ. දුරස්ථ වෙරළ තීරයන්, ධීවර ගම්මාන සහ දේශීය ප්රජාවන් සමඟ සමීප වෙමින්, සොබාදහම අත්විඳීමට ලැබීම සංචාරකයින්ගේ සතුට තීව්ර කරන සාධකයක් ලෙස හඳුනාගෙන ඇත. වේගවත් ලෝකයෙන් මිදී, ප්රාදේශීය සංස්කෘතීන් සමඟ සම්බන්ධ වෙමින් මන්දගාමීව ගමනාන්තයක් අත්විඳීමට සංචාරකයින් දක්වන උනන්දුව මෙමඟින් මැනවින් පිළිබිඹු වේ.මෙම ලැයිස්තුවේ ශ්රී ලංකාව සමඟින් පැනමාව, ගෝතමාලාව, සිම්බාබ්වේ, අයිස්ලන්තය සහ ඉක්වදෝරය වැනි රටවල් ද ඇතුළත් වී ඇති අතර, මෙය ශ්රී ලංකාව ජාත්යන්තර සංචාරක සිතියමේ සුවිශේෂී ස්ථානයක පවතින බව සනාථ කරන්නකි. සංස්කෘතික අනන්යතාව, ජෛව විවිධත්වය සහ වෙරළ තීරයේ අසිරිය පදනම් කරගනිමින් සංචාරක බලධාරීන් ගෙන යන ප්රවර්ධන වැඩසටහන් මෙවැනි ජාත්යන්තර ඇගයීම් හරහා තවදුරටත් ශක්තිමත් වන අතර, එය ඉදිරි වසරවලදී වැඩි සංචාරකයින් පිරිසක් මෙරටට ආකර්ෂණය කර ගැනීමට ද මහඟු පිටුවහලක් වනු ඇත.
ලොව සතුටින්ම සංචාරය කළ හැකි රටවල් 10 අතරට ශ්රී ලංකාවත් එක්වෙයි
