සෞදි අරාබියේ රියාද් සිට පැමිණි ශ්‍රී ලංකන් ගුවන් සේවයට අයත් ගුවන් යානයක සේවිකාවන් දෙදෙනෙකුට පහරදුන් 28 හැවිරිදි සෞදි ජාතිකයෙකු අත්අඩංගුවට ගෙන ඇත.මෙම සිදුවීම අද (26) උදෑසන 6.32ට කටුනායක බණ්ඩාරනායක ජාත්‍යන්තර ගුවන් තොටුපළට (BIA) පැමිණි UL-266 දරණ ගුවන් යානයේදී සිදුව ඇත. මැලේසියාව බලා යමින් සිටි මෙම මගියා ගුවන් යානය ගොඩබෑමට සූදානම් වෙමින් තිබියදී—සියලු මගීන්ට ආසන පටි පැළඳීමට අවශ්‍ය මොහොතක—වැසිකිළියට යාමට උත්සාහ කර ඇතැයි වාර්තා වේ.ගුවන් සේවිකාවන් විසින් මේ පිළිබඳව නියමුවා දැනුවත් කිරීමෙන් පසු ගුවන් තොටුපළ පොලිසිය දැනුවත් කර ඇති අතර, ගුවන් යානය ගොඩබෑමෙන් පසු සැකකරු අත්අඩංගුවට ගෙන තිබේ.කටුනායක ගුවන් තොටුපළ පොලිසිය සහ කටුනායක ගුවන් තොටුපළ සංචාරක පොලිසිය ඒකාබද්ධව මේ පිළිබඳව පරීක්ෂණ පවත්වයි. මෙම සිදුවීම ශ්‍රී ලංකා ගුවන් සීමාවේදී සිදු වූ බැවින්, අදාළ සෞදි ජාතිකයා හෙට (27) දින කොළඹ අංක 01 මහේස්ත්‍රාත් අධිකරණයට ඉදිරිපත් කිරීමට නියමිතය.
ශ්‍රී ලංකන් ගුවන් සේවිකාවන්ට පහරදුන් සෞදි ජාතිකයෙක් අත්අඩංගුවට
