ශ්රේෂ්ඨාධිකරණය විසින් අනුමත කරන ලද හජ් මාර්ගෝපදේශ උල්ලංඝනය කරමින් නව හජ් කමිටුව කටයුතු කරන බවට චෝදනා කරමින් සමස්ත ලංකා හජ් සංචාරක සංවිධායකයන්ගේ සංගමය (ACHTOA) විසින් අභියාචනාධිකරණය හමුවේ රිට් පෙත්සමක් ගොනු කර ඇත. රියාස් මිහුලාර් මහතාගේ සභාපතිත්වයෙන් යුත් මෙම කමිටුව විසින් ක්රියාකරු ඇගයීම් නිර්ණායක සහ කෝටා වෙන්කිරීමේ ක්රමවේදයන් නීති විරෝධී ලෙස වෙනස් කර ඇති බවත්, වන්දනාකරුවන්ට රුපියල් 750,000 ක අත්තිකාරම් මුදලක් තැන්පත් කිරීමට බලකිරීම ඇතුළු මතභේදාත්මක මූල්ය ක්රියා පටිපාටීන් හඳුන්වා දී ඇති බවත් පෙත්සම මගින් පෙන්වා දෙයි. මීට අමතරව, මීට පෙර විනය විරෝධී ක්රියාවලට සම්බන්ධ වූ සංවිධායකයන්ට බලපත්ර ලබාදීම සහ සවුදි අරාබියේ නීතිවලට පටහැනි අයුරින් කෝටා වෙන්කිරීමේ ක්රමවේද වෙනස් කිරීම පිළිබඳවද එහි චෝදනා එල්ල කර ඇත.මෙම පෙත්සම ACHTOA හි සභාපති එම්.එස්.එච්. මොහොමඩ් මහතා වෙනුවෙන් නීතිඥ අමිල කුමාර මහතා විසින් ගොනු කර ඇති අතර, ජනාධිපති නීතිඥ සංජීව ජයවර්ධන මහතාගේ උපදෙස් මත එය මෙහෙයවනු ලබයි. මුස්ලිම් ආගමික හා සංස්කෘතික කටයුතු අධ්යක්ෂවරයා සහ විෂයභාර අමාත්යවරයා ඇතුළු වගඋත්තරකරුවන් 103 දෙනෙකු මෙහි නම් කර ඇති අතර, පෙත්සම විභාගයට ගැනීම ජනවාරි 21, 29 සහ 30 යන දිනවලදී සිදු කිරීමට නියමිතය. රජය දූෂණයට එරෙහි බව ප්රකාශ කළද, මුස්ලිම් ප්රජාව නියෝජනය කරන ඇතැම් නායකයන් තවමත් මෙවැනි ආයතන තුළ අත්තනෝමතික ලෙස කටයුතු කරන බවත්, වත්මන් රජය ප්රවර්ධනය කරන නීතියේ ආධිපත්යය හජ් කටයුතු සඳහාද අදාළ විය යුතු බවත් සංගමයේ සභාපතිවරයා වැඩිදුරටත් අවධාරණය කළේය.
හජ් කමිටුවේ තීරණවලට එරෙහිව අභියාචනාධිකරණය හමුවේ පෙත්සමක්!
