ශ්රී ලංකාවේ යෝජිත අධ්යාපන ප්රතිසංස්කරණ යටතේ 6 වන ශ්රේණිය සඳහා හඳුන්වා දුන් කිසිදු විෂය මොඩියුලයක් ඉවත් කර නොමැති බව අග්රාමාත්ය ආචාර්ය හරිනි අමරසූරිය මෙනෙවිය අඟහරුවාදා පාර්ලිමේන්තුවේදී ප්රකාශ කළාය. විපක්ෂ මන්ත්රී නලින් බණ්ඩාර මහතා යොමුකළ ප්රශ්නයකට පිළිතුරු දෙමින් ඇය සඳහන් කළේ, 6 වන ශ්රේණියේ මෙම ප්රතිසංස්කරණ 2027 වසරේ සිට ක්රියාත්මක කිරීමට රජය සැලසුම් කර ඇති බවයි. දැනට මුද්රණය කර ඇත්තේ පළමු වාරයට අදාළ මොඩියුල පමණක් බවත්, ඒවා ප්රතික්ෂේප කිරීමක් හෝ ඉවත් කිරීමක් සිදුකර නොමැති බවත් පැවසූ අග්රාමාත්යවරිය, ප්රතිසංස්කරණ ක්රියාවලිය ආරම්භ වූ පසු එම මොඩියුල භාවිතයට ගන්නා බවත් මූල්ය අලාභයක් වන අයුරින් කටයුතු කිරීමට තීරණය කර නොමැති බවත් අවධාරණය කළාය.මේ අතර, ගබඩාවල තැන්පත් කර තිබූ 6 වන ශ්රේණියේ පෙළපොත් බෙදාහැරීමේ කටයුතු මේ වන විටත් ආරම්භ කර ඇති අතර පෙබරවාරි මැද භාගය වන විට එම කටයුතු අවසන් කිරීමට අපේක්ෂා කරන බවද ඇය පැවසුවාය. නව විෂය මාලාව මෙතෙක් ක්රියාත්මක වී නොමැති බැවින්, ගුරුවරුන් දැනට පවතින විෂය නිර්දේශය යටතේ පන්ති කාමර ඉගැන්වීම් කටයුතු අඛණ්ඩව සිදුකරගෙන යන බවද අග්රාමාත්යවරිය වැඩිදුරටත් සඳහන් කළාය.
හය වසරේ නව විෂය මොඩියුල ඉවත් කර නැහැ: අගමැතිනියගෙන් පැහැදිලි කිරීමක්
