මෙරට අධ්යාපන ක්ෂේත්රයේ සුවිශේෂී වෙනසක් සනිටුහන් කරමින්, හෙටින් ඇරඹෙන නව අධ්යයන වර්ෂයේදී 1 සහ 6 ශ්රේණි සඳහා නව විෂය මාලාවන් හඳුන්වා දීමට රජය සූදානම් වේ. අග්රාමාත්ය හරිනි අමරසූරිය මෙනවිය සඳහන් කළේ 6 වන ශ්රේණියේ දරුවන් සඳහා ජනවාරි 21 වනදාත්, 1 වන ශ්රේණියේ දරුවන් සඳහා ජනවාරි 29 වනදාත් මෙම නව වැඩපිළිවෙළ නිල වශයෙන් ක්රියාත්මක වන බවයි. අධ්යාපන ප්රතිසංස්කරණ පිළිබඳ පැවති විශේෂ මාධ්ය හමුවකදී අගමැතිනිය මේ බව අනාවරණය කළාය.මෙම නව ක්රමවේදය හුදෙක් විෂය නිර්දේශ වෙනස් කිරීමකට පමණක් සීමා නොවන අතර, සිසුන් නව විෂය මාලාවට හුරු කරවීම සඳහා විශේෂ වැඩසටහන් ද සැලසුම් කර ඇත. මීට අමතරව, දෙමාපියන් දැනුවත් කිරීමේ වැඩසටහන් මෙන්ම සිසුන්ට නිවැරදි ලෙස විෂයන් තෝරා ගැනීමට මග පෙන්වන නව උපදේශන ක්රමවේදයන් ද මේ යටතේ ක්රියාත්මක කිරීමට අවධානය යොමු කර තිබේ.නව විෂය මාලාව පන්ති කාමරය තුළ සාර්ථකව ක්රියාත්මක කිරීම වෙනුවෙන් ගුරුවරුන් සන්නද්ධ කිරීමට ද පියවර ගෙන ඇත. ඒ අනුව ගුරු පුහුණුකරුවන් පුහුණු කිරීමේ වැඩසටහන් 7,181ක් පවත්වා ඇති අතර, ගුරුවරුන් 132,580ක් දැනටමත් පුහුණුව ලබා අවසන්ය. මෙය නව මොඩියුල යටතේ ඉගැන්වීම් සිදු කරන සමස්ත ගුරු ප්රජාවෙන් 93%ක් වැනි ඉහළ ප්රතිශතයක් බව අග්රාමාත්යවරිය මෙහිදී පෙන්වා දුන්නාය.අධ්යාපන පරිවර්තනය සාර්ථක කර ගැනීම සඳහා අවශ්ය භෞතික යටිතල පහසුකම් සැපයීම කෙරෙහි ද රජයේ දැඩි අවධානය යොමු වී ඇත. නවීන ඉගෙනුම් පරිසරයක් තුළ මෙම ප්රතිසංස්කරණ ඉදිරියට ගෙන යාම සඳහා පාසල් පද්ධතියේ පවතින අඩුපාඩු සපුරාලීමට අවශ්ය පියවර ගන්නා බව ද අග්රාමාත්ය හරිනි අමරසූරිය මෙනවිය වැඩිදුරටත් කියා සිටියාය.
අධ්යාපන ප්රතිසංස්කරණ ඇරඹෙයි: ගුරුවරුන් ලක්ෂයකට වැඩි පිරිසකට පුහුණුව අවසන්
