නව අධ්‍යාපන ප්‍රතිසංස්කරණ ඔස්සේ අභියෝගාත්මක ප්‍රදේශවල පාසල් සඳහා විශේෂ සහායක් ලබා දෙන බව අග්‍රාමාත්‍ය සහ අධ්‍යාපන අමාත්‍ය ආචාර්ය හරිනි අමරසූරිය මහත්මිය පැවසුවාය. රජය, නිලධාරීන් සහ ජනතාව එක්ව කටයුතු කරන්නේ නම් විසඳිය නොහැකි කිසිදු ගැටලුවක් නොමැති බව ද ඇය වැඩිදුරටත් සඳහන් කළාය.ඇය මෙම අදහස් පළ කළේ 2026 ප්‍රතිසංස්කරණ සඳහා සූදානම් වීම පිළිබඳව අධ්‍යාපන නිලධාරීන්, ගුරුවරුන් සහ දෙමාපියන් සමඟ සාකච්ඡා කිරීම සඳහා මඩකලපුව දිස්ත්‍රික්කයේ කල්කුඩා සහ එරාවූර් කලාප අධ්‍යාපන කාර්යාල වෙත කළ සංචාරයකදීය.“විභාග ප්‍රතිඵලවලදී පවා මඩකලපුව යනු අසීරු ප්‍රදේශයක්. ඒ නිසා තමයි අපි මෙහි අමතර සහයෝගය ලබා දීමට අවධානය යොමු කරන්නේ,” ඇය කීවාය.සෑම දරුවෙකුටම ගුණාත්මක අධ්‍යාපනයක් ලබා ගැනීම සඳහා පාසල්, ගුරුවරුන්, විදුහල්පතිවරුන් සහ අධ්‍යාපන පරිපාලනය වැඩිදියුණු කිරීමේ අවශ්‍යතාව අග්‍රාමාත්‍යවරිය අවධාරණය කළාය. “අධ්‍යාපනය කියන්නේ රට සංවර්ධනය කරන්න තියෙන ප්‍රධානම යතුර. අපි එකට වැඩ කළොත් ඕනෑම අභියෝගයක් ජයගෙන සියලුම දරුවන්ට යහපත් අනාගතයක් ලබා දෙන්න පුළුවන්,” ඇය වැඩිදුරටත් පැවසුවාය.පාර්ලිමේන්තු මන්ත්‍රී කන්දසාමි ප්‍රභූ, කලාප අධ්‍යාපන අධ්‍යක්ෂවරුන්, විදුහල්පතිවරුන් සහ ගුරුවරුන් මෙම අවස්ථාවට එක්ව සිටියහ.
අභියෝගාත්මක ප්‍රදේශවල පාසල්වලට විශේෂ සහාය – අගමැති ආචාර්ය හරිනි අමරසූරිය
