අවසරයකින් තොරව අවමංගල්‍යශාලා සහ කාර්යාල පවත්වාගෙන යාම ගැන COPA වෙතින් කොළඹ මහනගර සභාවට දැඩි දෝෂාරෝපණ!

​බොරැල්ල කනත්තේ පරිපාලක නිල නිවාස තැනීමට වෙන් කළ ඉඩමක අනවසරයෙන් පවත්වාගෙන යන අවමංගල්‍ය ශාලාවකට එරෙහිව පියවර ගැනීමට කොළඹ මහ නගර සභාව (CMC) අපොහොසත් වීම සම්බන්ධයෙන් රාජ්‍ය ගිණුම් කාරක සභාවේ (COPA) අවධානය යොමු වී ඇත.​COPA කමිටුව නිකුත් කළ නිවේදනයට අනුව, මෙම සිදුවීම සම්බන්ධයෙන් විමර්ශනයක් පවත්වා වාර්තාවක් ඉදිරිපත් කරන ලෙස කමිටුව CMC වෙත උපදෙස් දී ඇත. එමෙන්ම මෑතකදී පැවති කමිටු රැස්වීමට පැමිණ සිටි කොළඹ මහනගර සභාවේ නියෝජිතයින්ට COPA කමිටුව සිය දෝෂාරෝපණය එල්ල කර ඇත.​වරදකරුට එරෙහිව නීතිමය පියවර ගෙන ඒ පිළිබඳ ප්‍රගතිය කමිටුවට වාර්තා කරන ලෙසද COPA විසින් CMC වෙත උපදෙස් ලබා දී ඇත.​අනවසර කාර්යාලයක් පවත්වාගෙන යන ‘අලි ගෙදර’ ඉඩම ආක්‍රමණය කිරීම සම්බන්ධයෙන් ගෙන ඇති ක්‍රියාමාර්ග පිළිබඳව ද COPA විසින් ප්‍රශ්න කරන ලදී. ඒ පිළිබඳව බස්නාහිර පළාත් ආණ්ඩුකාරවරයා සමග සාකච්ඡාවක් පවත්වන බවට CMC නිලධාරීන් COPA වෙත දැනුම් දී තිබේ. ඉඩමේ සම්පූර්ණ ප්‍රමාණය පර්චස් 140ක් වුවද, ඉන් පර්චස් 40ක වාඩිලෑම සඳහා අනෙක් පාර්ශවය සමඟ CMC විසින් ගිවිසුමක් අත්සන් කර ඇති බව රැස්වීමේදී හෙළි විය. එහිදී තවදුරටත් අනාවරණය වූයේ 1992 වසරේදී කල් බදු ගිවිසුමක් අත්සන් කර ඇති අතර, එම බදු කාලය 2022 වසරේදී අවසන් වී ඇති බවයි.​අනවසර ඉදිකිරීම් සම්බන්ධයෙන් කටයුතු කිරීමේදී නීතියට අනුකූලව ක්‍රියා කරන ලෙස COPA සභාපති කබීර් හෂීම් මහතා විසින් කොළඹ මහ නගර සභාවට උපදෙස් ලබා දී තිබේ.​නියෝජ්‍ය අමාත්‍යවරුන් වන අරවින්ද සේනාරත්න, දිනිඳු සමන් හේන්නායක, අරුණ ජයසේකර, පාර්ලිමේන්තු මන්ත්‍රීවරුන් වන එම්. එල්. ඒ. එම්. හිස්බුල්ලා, රෝහිත අබේගුණවර්ධන, ජේ. සී. අලවතුවල, චාමර සම්පත් දසනායක, කාවින්ද ජයවර්ධන සහ රුවන්තිලක ජයකොඩි, තුෂාරි ජයසිංහ, සුනිල් රත්නසිරි, චන්දන සූරියආරච්චි සහ කොළඹ නගරාධිපතිනි ව්‍රායි කැලි බල්තසාර් මහත්මිය ද මෙම රැස්වීම සඳහා සහභාගී වී සිටියහ.