ලොව සුප්රකට ‘ට්රිප් ඇඩ්වයිසර්’ (Tripadvisor) ආයතනය විසින් ප්රකාශයට පත් කරන ලද 2026 වසරේ ආසියාවේ හොඳම වෙරළ තීරයන් අතරට ශ්රී ලංකාවේ මිරිස්ස සහ බෙන්තොට වෙරළ තීරයන් තේරී පත්වී ඇත. සංචාරකයින්ගේ ඉහළම ඇගයීමට ලක්වන ස්ථාන සඳහා පිරිනමනු ලබන ‘ට්රැවලර්ස් චොයිස් අවෝඩ්ස් බෙස්ට් ඔෆ් ද බෙස්ට්’ (Travelers’ Choice Awards Best of the Best) ලැයිස්තුවේ මිරිස්ස වෙරළ තීරය පස්වන ස්ථානය දිනාගෙන ඇති අතර බෙන්තොට වෙරළ තීරයට හිමිව ඇත්තේ හත්වන ස්ථානයයි. ට්රිප් ඇඩ්වයිසර් වෙබ් අඩවියේ ලැයිස්තුගත කර ඇති ස්ථාන අතරින් 1% කටත් වඩා අඩු ප්රමාණයකට පමණක් හිමිවන මෙම ගෞරවනීය සම්මානය හිමිවන්නේ මාස 12 ක කාලයක් පුරා සංචාරකයින්ගෙන් අඛණ්ඩව ලැබුණු විශිෂ්ට සමාලෝචන පදනම් කරගනිමිනි.දිවයිනේ දකුණු වෙරළ තීරයේ පිහිටි මිරිස්ස වෙරළ තීරය එහි රන්වන් වැලි තලාව, සන්සුන් මුහුදු තීරය සහ සර්ෆින් ක්රීඩාව සඳහා ඇති ප්රසිද්ධිය හේතුවෙන් සංචාරකයින් අතර ඉමහත් ජනප්රියත්වයක් උසුලයි. විශේෂයෙන්ම ‘කොකනට් ට්රී හිල්’ (Coconut Tree Hill) සිට දිස්වන හිරු බැස යන දර්ශනය සහ රාත්රී කාලයේ වෙරළාශ්රිතව පවතින සජීවී වටපිටාව මිරිස්සට ආවේණික සුන්දරත්වයක් එක් කරයි. මේ අතර නිරිතදිග වෙරළ තීරයේ පිහිටි බෙන්තොට වෙරළ තීරය ජෙට් ස්කීං (Jet skiing) සහ කයිට් සර්ෆින් (Kitesurfing) වැනි ජල ක්රීඩා සඳහා මෙන්ම විවේකීව ඇවිදීමට සුදුසු මනරම් පරිසරය හේතුවෙන් සංචාරක ආකර්ෂණය දිනාගෙන ඇත.මෙවර ආසියාවේ හොඳම වෙරළ තීරය ලෙස තායිලන්තයේ ඵුකෙට් හි පිහිටි බනානා වෙරළ (Banana Beach) ප්රථම ස්ථානය දිනාගත් අතර, ඉන්දුනීසියාවේ කෙලින්කින් (Kelingking), ඉන්දියාවේ රාධානගර් (Radhanagar) සහ පිලිපීනයේ වයිට් බීච් (White Beach) යන වෙරළ තීරයන් ද මුල් දස දෙනා අතරට ඇතුළත් වේ. මෙම ජාත්යන්තර ඇගයීම හරහා ආසියාවේ ප්රමුඛතම වෙරළාශ්රිත සංචාරක ගමනාන්තයක් ලෙස ශ්රී ලංකාව සතු ස්ථානය තවදුරටත් තහවුරු වී තිබේ.
ආසියාවේ හොඳම වෙරළ තීරයන් අතරට මිරිස්ස සහ බෙන්තොට එක්වෙයි
