සෞඛ්‍ය හා ජනමාධ්‍ය අමාත්‍ය ආචාර්ය නලින්ද ජයතිස්ස මහතා පවසන පරිදි, ඉදිරි දශකය තුළ ශ්‍රී ලාංකිකයන්ගෙන් 4න් 1ක් (25%ක්) අවුරුදු 60ට වැඩි වනු ඇත. පසුගිය වසර කිහිපය තුළ ශ්‍රී ලංකාවේ ජනගහන වර්ධනය අඩුවීම පිළිබඳව අදහස් දක්වමින් අමාත්‍යවරයා මේ බව පැවසීය.ලෝක සෞඛ්‍ය සංවිධානයේ (WHO) අග්නිදිග ආසියානු කලාපීය කමිටුවේ 78 වන සැසියේ දෙවන දිනයේදී පැවති මාධ්‍ය හමුවකට එක්වෙමින් අමාත්‍ය ජයතිස්ස මහතා කියා සිටියේ, මෙම අගය, සමස්ත අග්නිදිග ආසියානු කලාපීය සාමාන්‍යයට වඩා සාපේක්ෂව ඉහළ අගයක් වනු ඇති බවයි. එම කලාපීය සාමාන්‍යය අනුව 60 ට වැඩි ජනගහනය පහෙන් එකක් (එනම් 20%ක්) පමණ වනු ඇතැයි ඇස්තමේන්තු කර ඇත.අමාත්‍යවරයා වැඩිදුරටත් අවධාරණය කළේ, වැඩිහිටි ජනතාව සඳහා සෞඛ්‍ය පද්ධතියට ප්‍රවේශවීමේ හැකියාව ශක්තිමත් කිරීමේ වැදගත්කමයි. “මෙම ඉලක්කය සාක්ෂාත් කරගත හැක්කේ ප්‍රාථමික සෞඛ්‍ය සේවය වැඩිදියුණු කිරීමෙනි. දැනටමත් කොට්ඨාස රෝහල්වල සහ ප්‍රාථමික වෛද්‍ය සේවා ආයතනවල ක්‍රියාත්මක වන 1,100ට අමතරව, අපි නව ප්‍රාථමික සෞඛ්‍ය සේවා ආයතන 1,000ක් ස්ථාපිත කරමින් සිටිමු. ඉදිරි වසර තුන තුළ එවැනි පහසුකම් 2,000කට වැඩි ප්‍රමාණයක් රට පුරා ක්‍රියාත්මක වනු ඇත,” ඔහු පැවසීය.”සෞඛ්‍ය සම්පන්න මහලු වියක් සහතික කිරීම අභියෝගයකි. කෙසේ වෙතත්, රජයක් ලෙස අපි මෙය ජාතියට, ආර්ථිකයට හෝ සෞඛ්‍ය පද්ධතියට බරක් ලෙස නොසලකමු,” ආචාර්ය ජයතිස්ස මහතා ප්‍රකාශ කළේය.එමෙන්ම, ශ්‍රී ලංකාවේ සෞඛ්‍ය සේවක පිරිස බෝවන රෝග සහ මාතෘ හා ළමා සෞඛ්‍ය අභියෝග සාර්ථකව ජයගෙන ඇති නමුත්, මහජන සෞඛ්‍ය අභියෝගවල ස්වභාවය දැන් වෙනස් වෙමින් පවතින බවද අමාත්‍යවරයා පෙන්වා දුන්නේය. “එම නිසා, අපි අපගේ සෞඛ්‍ය සේවක පිරිස ඒ අනුව පුහුණු කිරීමට පටන් ගෙන ඇති අතර පුහුණු විෂයමාලාව ද සංශෝධනය කර ඇත,” ඔහු පැවසීය.එක්සත් ජාතීන්ගේ ජනගහන අරමුදල (UNFPA) විසින් 2012 දී නිකුත් කරන ලද වාර්තාවකට අනුව, “ශ්‍රී ලංකාව දකුණු ආසියාවේ ශීඝ්‍රයෙන් වයස්ගත වන සමාජවලින් එකක් වන අතර, නවතම ශ්‍රී ලංකා ජනගහන හා නිවාස සංගණන (SLPHC) වාර්තා අනුව 2012 දී අවුරුදු 60ට වැඩි වැඩිහිටි ජනගහනයේ කොටස 12.4% ක් විය. මෙම අගය ශතවර්ෂයේ මැද භාගය වන විට දෙගුණයක් වනු ඇත. එවිට පුද්ගලයන් හතර දෙනෙකුගෙන් එක් අයෙකු වයස අවුරුදු 60 හෝ ඊට වැඩි වනු ඇත”
ඉදිරි දශකය ඇතුළත ශ්‍රී ලංකා ජනගහනයෙන් 25%ක් අවු. 60ට වැඩි වේ – සෞඛ්‍ය ඇමති
