ඉන්දියාව සහ එක්සත් ජනපදය විසින් ඉදිරි වසර 10ක කාලය සඳහා ආරක්ෂක සහයෝගීතාව පුළුල් කිරීමට අදාළ රාමු ගිවිසුමකට අත්සන් තබා ඇත.මෙම ගිවිසුම, එක්සත් ජනපද ආරක්ෂක ලේකම් පීට් හෙග්සෙත් සහ ඔහුගේ ඉන්දීය සහකරු වන රාජ්නාත් සිං මහතා අතර ක්වාලාලම්පූර්හිදී පැවති හමුවකින් අනතුරුව ප්‍රකාශයට පත් විය.මෙම ගිවිසුම මගින් “සම්බන්ධීකරණය, තොරතුරු හුවමාරුව සහ තාක්ෂණික සහයෝගීතාව” වැඩිදියුණු කරන අතර, “කලාපීය ස්ථාවරත්වය සහ වැළැක්වීම” ඉදිරියට ගෙන යනු ඇතැයි හෙග්සෙත් මහතා X (ට්විටර්) ඔස්සේ සඳහන් කළේය.මෙම ගිවිසුම එළිදැක්වෙන්නේ, එක්සත් ජනපද ජනාධිපති ඩොනල්ඩ් ට්‍රම්ප් විසින් ඉන්දියාවට සියයට 50ක තීරුබදු පැනවීමෙන් පසුව සහ රුසියානු තෙල් හා ආයුධ මිලදී ගැනීම් සඳහා සියයට 25ක දඩයක් නියම කිරීමෙන් පසු, දෙරට වෙළඳ ගිවිසුමක් අවසන් කිරීමට සහ පවතින උණුසුම් සබඳතා සමනය කිරීමට උත්සාහ කරන මොහොතක වීම විශේෂත්වයකි.මෙම ගිවිසුම ඉන්දු-එක්සත් ජනපද ආරක්ෂක සබඳතාවල සමස්ත ක්ෂේත්‍රය සඳහාම ප්‍රතිපත්තිමය මඟ පෙන්වීමක් ලබා දෙනු ඇතැයි අපේක්ෂා කෙරේ.”මෙය අපගේ වර්ධනය වන උපායමාර්ගික අභිසාරීතාවේ සංඥාවක් වන අතර, නව දශකයක හවුල්කාරිත්වයක් සනිටුහන් කරනු ඇත. අපගේ ද්විපාර්ශ්වික සබඳතාවල ප්‍රධානතම කුළුණක් ලෙස ආරක්ෂාව පවතිනු ඇත. නිදහස්, විවෘත සහ නීති මත පදනම් වූ ඉන්දු-පැසිෆික් කලාපයක් සහතික කිරීම සඳහා අපගේ හවුල්කාරිත්වය ඉතා වැදගත්” බව සිං මහතා X හි පළ කළ සටහනක දැක්වේ.යුරේසියා සමූහයේ චින්තන ටැංකියේ (Eurasia Group think tank) ප්‍රමිත් පාල් චෞද්රි මහතාට අනුව, මෙම ගිවිසුම මේ වසරේ ජූලි-අගෝස්තු මාසවලදී අවසන් කිරීමට නියමිතව තිබුණද, පකිස්ථානය සමඟ ඇති ගැටුම අවසන් කිරීමේදී තමාගේ භූමිකාව පිළිබඳ ට්‍රම්ප්ගේ ප්‍රකාශයන් සම්බන්ධයෙන් ඉන්දියාවේ ඇති වූ අතෘප්තිය හේතුවෙන් එය ප්‍රමාද වී ඇත.මෙම ගිවිසුම “දෙරටේ හමුදාවන්ට අන්තර්ක්‍රියාකාරීත්වය ලබා ගැනීමටත්, ඉන්දියාවට තාක්ෂණයට ප්‍රවේශ වීමටත්, ආරක්ෂක අංශ දෙකට එක්ව කටයුතු කිරීමටත්” පහසුකම් සලසන, දෙරට අතර ගිවිසුම් මාලාවක නවතම පියවර බව චෞද්රි මහතා පැවසීය.”මෙය එම ක්ෂේත්‍ර තුනෙහිම තවදුරටත් විභවයන් සපයනවා” යැයි ඔහු වැඩිදුරටත් පැවසීය.ඉන්දියාව සහ එක්සත් ජනපදය මෑතක සිට තම ආරක්ෂක සබඳතා ස්ථාවරව ඉහළ නංවමින් සිටී.මෙම වසරේ පෙබරවාරි මාසයේදී ඉන්දීය අග්‍රාමාත්‍ය නරේන්ද්‍ර මෝදි මහතා එක්සත් ජනපදයේ සංචාරයක නිරත වූ අවස්ථාවේදී ආරක්ෂාව ප්‍රධාන සාකච්ඡා මාතෘකාවක් වූ අතර, එහිදී ට්‍රම්ප් මහතා කියා සිටියේ, එක්සත් ජනපදය විසින් ඉන්දියාවට හමුදා උපකරණ අලෙවිය තවත් බිලියන ගණනකින් වැඩි කරන බවත්, අවසානයේදී දිල්ලියට F-35 ගැටුම් නෞකා (stealth warplanes) සැපයීමට මාර්ගය විවෘත කරන බවත් ය.එහෙත් එතැන් පටන්, දිල්ලිය වට්ටම් සහිත රුසියානු තෙල් මත යැපීම මෙන්ම මොස්කව් සමඟ ඇති දිගුකාලීන ආරක්ෂක සම්බන්ධතාවය ද ට්‍රම්ප් පරිපාලනයට ප්‍රධාන හිසරදයක් වී තිබේ.රුසියාව ඉන්දියාවට ආයුධ සපයන ප්‍රධාන සැපයුම්කරුවෙකු ලෙස දිගටම කටයුතු කළද, දිල්ලිය සිය ආයුධ කළඹ විවිධාංගීකරණය කිරීමට සහ දේශීය ධාරිතාව ඉහළ නැංවීමට උත්සාහ කරන බැවින්, ඉන්දීය ආරක්ෂක ආනයනවල රුසියාවේ කොටස ස්ථාවරව පහත වැටෙමින් තිබේ.මෑත මාසවලදී, එක්සත් ජනපදයෙන් බලශක්ති සහ ආරක්ෂක මිලදී ගැනීම් වැඩි කිරීමට තමන් කැමති බවට ඉන්දියාව ඉඟි කර ඇත.දෙරට නොවැම්බර් මාසය වන විට දීර්ඝ කාලයක් තිස්සේ අපේක්ෂා කළ වෙළඳ ගිවිසුමකට එළඹීම සඳහා ඉහළ අවදානම් සහිත වෙළඳ සාකච්ඡාවලට එළඹ සිටී.
ඉන්දියාව සහ අමෙරිකාව අතර වසර 10ක නව ආරක්ෂක ගිවිසුමක්!
