ඉන්දීය ‘ප්‍රිමියර් ලීග්’ තරගාවලිය ව්‍යාකූලයි: ක්‍රීඩකයින් අතරමං, සංවිධායකයෝ පළා යති!

ජම්මු සහ කාශ්මීර්හි ශ්‍රීනගර්හි පැවැත්වීමට නියමිතව තිබූ, දේශීය, ජාතික සහ ජාත්‍යන්තර ක්‍රීඩකයින් සහභාගී වූ ඉන්දියන් හෙවන් ප්‍රිමියර් ලීග් (IHPL) නම් T20 ක්‍රිකට් තරඟාවලිය බරපතල අභියෝග රැසකට මුහුණ දී ඇත. ඇතැම් ක්‍රීඩකයින් ප්‍රාදේශීය හෝටලයක අතරමං වී ඇති අතර, සංවිධායකයින් පළා ගොස් ඇති බවට වාර්තා වේ.​පෞද්ගලික අනුග්‍රාහකයින් විසින් සංවිධානය කරන ලද මෙම තරඟාවලියේදී, ගෙවීම් නොකිරීම හේතුවෙන් ක්‍රීඩකයින් කිහිප දෙනෙකු තරඟ වර්ජනය කිරීම නිසා බාධා ඇතිවී ඇත.​’Economic Times’ වාර්තාවකට අනුව, මෙම IHPL තරඟාවලිය මොහාලි පදනම් කරගත් ‘යුවා සංගමය’ (Yuva Society) විසින් සංවිධානය කර ඇති අතර, එහි සමාරම්භක උත්සවයට සහ තරඟයට ජම්මු සහ කාශ්මීර් ක්‍රීඩා කවුන්සිලයේ (J&K Sports Council) ලේකම්වරිය වන නුස්හත් ගුල් මහත්මිය සහභාගී වී ඇත.​කෙසේ වෙතත්, මේ වන විට ආණ්ඩුවට හෝ ක්‍රීඩා කවුන්සිලයට IHPL සමඟ කිසිදු සම්බන්ධයක් නොමැති බව ගුල් මහත්මිය ප්‍රකාශ කරයි. “නිල වශයෙන්, මෙම ලීගයට රජය හෝ ක්‍රීඩා කවුන්සිලය සමඟ කිසිදු සම්බන්ධයක් නැහැ. ඔවුන් තරඟ සඳහා බක්ෂි ක්‍රීඩාංගණය වෙන්කර ගෙන ඒ සඳහා ගෙවීම් කළා,” ඇය වැඩිදුරටත් කියා සිටියාය.​තරඟ සංවිධානවල අක්‍රමිකතා සහ කොන්ත්‍රාත්තු හා ගෙවීම් පිළිබඳ පැහැදිලි බවක් නොමැතිවීම හේතුවෙන් නිම්නයේ ක්‍රිකට් ක්‍රීඩකයෙක් මීට පෙර තරඟාවලියෙන් ඉවත් වන බව නිවේදනය කර තිබුණි.​ගෙවීම් නොලැබීම හේතුවෙන් ක්‍රීඩකයින් ක්‍රීඩා කිරීම ප්‍රතික්ෂේප කිරීම නිසා සෙනසුරාදා සහ අද දින බක්ෂි ක්‍රීඩාංගණයේ පැවැත්වීමට නියමිතව තිබූ තරඟ අවලංගු කර ඇත.​අද තරඟ කිරීමට නියමිතව සිටි ක්‍රීඩකයෙකු පවසා ඇත්තේ “තාක්ෂණික ගැටළු” හේතුවෙන් පිටියට නොඑන ලෙස තමාට උපදෙස් දුන් බවයි. මේ හේතුවෙන් බොහෝ ජාත්‍යන්තර ක්‍රීඩකයින් ශ්‍රීනගර් නුවරින් පිටත්ව ගොස් ඇති අතර, ජම්මු සහ කාශ්මීරයේ ක්‍රිකට් ක්‍රීඩකයින් කිහිප දෙනෙක් ප්‍රාදේශීය හෝටලයක රැඳී සිටිති.​ආහාරපාන සපයන අය, බස් රියදුරන් සහ අනෙකුත් සේවා සපයන්නන් හා සම්බන්ධ පුද්ගලයන් ද තමන්ට ගෙවීම් නොකළ බවට චෝදනා කරන අතර ඔවුන්ගේ හිඟ මුදල් ලැබීම පිළිබඳව කනස්සල්ල පළ කරති.​ප්‍රමුඛ ජම්මු සහ කාශ්මීර ක්‍රිකට් ක්‍රීඩකයෙකු විසින් අනුමත කරන ලද මෙම ලීගය BCCI හෝ ජම්මු සහ කාශ්මීර් ක්‍රිකට් සංගමය (JKCA) විසින් පිළිගෙන නොමැත.