ඊශ්‍රායලයේදී පිහියෙන් ඇන ඝාතනයට ලක් වූ ශ්‍රී ලාංකිකයා ගාල්ල, බටපොල, කොණ්ඩගල ප්‍රදේශයේ පදිංචිව සිටි 38 හැවිරිදි දෙදරු පියෙකු වන කේ.කේ. තරිඳු ශානක මහතා බවට හඳුනාගෙන ඇත. ඔහු මේ වසරේ සැප්තැම්බර් මාසයේදී වඩු කාර්මිකයෙකු ලෙස ඉදිකිරීම් අංශයේ රැකියාවක් සඳහා ඊශ්‍රායලයට පැමිණ තිබිණි. ඊශ්‍රායලයේ ශ්‍රී ලංකා තානාපති කාර්යාලයේ නිලධාරීන් ඝාතනය සම්බන්ධ විමර්ශන මෙහෙයවන පොලිස් කණ්ඩායම හමුවීම සඳහා බ්‍රහස්පතින්දා උදෑසන ටෙල් අවිව් දිස්ත්‍රික්කයේ සලාමෙහ් පොලිස් ස්ථානයට ගොස් ඇත. සිද්ධිය සිදුවන අවස්ථාවේදී මියගිය පුද්ගලයා සමඟ සිටි ශ්‍රී ලාංකිකයන් දෙදෙනෙකුගෙන් ද ඊශ්‍රායල බලධාරීන් ප්‍රශ්න කර තිබේ. සාක්ෂිකරුවන්ගේ ප්‍රකාශවලට අනුව, සිද්ධිය වූ ස්ථානය අසල නවාතැනක ශ්‍රී ලාංකිකයන් 13 දෙනෙකු පදිංචිව සිට ඇත. බදාදා රාත්‍රී 11:00 ට පමණ ශානක මහතා සහ තවත් පුද්ගලයෙකු ආසන්නයේ ඇති උද්‍යානයක මත්පැන් පානය කරමින් සිට ඇති බව වාර්තා වේ. ශානක මහතා උද්‍යානයේ කොනකට ගොස් මුත්‍රා කිරීමට උත්සාහ කිරීමේදී ගැටුමක් ඇති වී ඇති බවට සැක කෙරේ. හදිසි ශබ්දයක් ඇසීමෙන් පසු ඔහුගේ සගයා නවාතැනේ සිටි අනෙක් අයට දැනුම් දී ඇති අතර, පසුව ඔවුන් ශානක මහතාගේ ගෙල කපා ඇති ආකාරය සොයාගෙන තිබේ. ඊශ්‍රායල පොලිසිය විසින් සැකකරුවෙකු අත්අඩංගුවට ගෙන ඇත. විමර්ශන කටයුතු සිදුවන බැවින් සැකකරුගේ අනන්‍යතාවය බලධාරීන් විසින් රඳවාගෙන තිබේ. මළ සිරුර අධිකරණ වෛද්‍ය පරීක්ෂණයක් සඳහා යොමු කර ඇති අතර, මියගිය පුද්ගලයාගේ බිරිඳගේ ලිඛිත අවසරය ලැබුණු පසු අවසාන පශ්චාත් මරණ පරීක්ෂණය පැවැත්වීමට නියමිතය. දේහය භූමදානය කිරීම සඳහා ශ්‍රී ලංකාවට ගෙන ඒමට කටයුතු සූදානම් කරන බව ඊශ්‍රායලයේ ශ්‍රී ලංකා තානාපති කාර්යාලය පවසයි.
ඊශ්‍රායලයේදී ඝාතනය වූ ශ්‍රී ලාංකිකයා හඳුනාගනී
