එක්සත් ජනපද ජනාධිපති ඩොනල්ඩ් ට්‍රම්ප් මහතා, ලිංගික අපරාධකරුවෙකු වූ ජෙෆ්රි එප්ස්ටීන් සම්බන්ධ ලිපිගොනු නිකුත් කිරීමට සිය පරිපාලනයට බල කරන නීති සම්පාදනයකට බදාදා දින අත්සන් තැබීය. මුලින් එයට ප්‍රතිරෝධය දැක්වුවද, ඔහු අවසානයේ සිය පක්ෂයෙන්ම එල්ල වූ දේශපාලන පීඩනයට අවනත විය. මාස ගණනකට පෙර ට්‍රම්ප්ට මෙම ලිපිගොනු බොහොමයක් තනිවම මුදා හැරීමට අවස්ථාව තිබුණි. “රිපබ්ලිකන් පක්ෂයට වඩා ඩිමොක්‍රටිකයන්ට වැඩි වශයෙන් බලපාන ‘එප්ස්ටීන්’ ප්‍රශ්නය, අපගේ පුදුමාකාර ජයග්‍රහණවලින් අවධානය වෙනතකට යොමු කිරීමට ඩිමොක්‍රටිකයින් භාවිතා කර ඇත,” යනුවෙන් ට්‍රම්ප් මෙම පනතට අත්සන් තැබූ බව නිවේදනය කරමින් සමාජ මාධ්‍ය සටහනක සඳහන් කළේය. දැන්, මෙම පනත යටතේ එප්ස්ටීන්ට අදාළ සියලුම ලිපිගොනු සහ සන්නිවේදනයන් මෙන්ම 2019 දී ෆෙඩරල් බන්ධනාගාරයකදී ඔහුගේ මරණය සම්බන්ධ පරීක්ෂණ පිළිබඳ ඕනෑම තොරතුරක් දින 30ක් ඇතුළත නිකුත් කිරීමට අධිකරණ දෙපාර්තමේන්තුවට සිදුවේ. එප්ස්ටීන්ගේ වින්දිතයින් පිළිබඳ තොරතුරු සහ ඉදිරියට කරගෙන යන ෆෙඩරල් පරීක්ෂණ සඳහා යම් යම් කොටස් ඉවත් කිරීමට අවසර ලබා දුනත්, “ලජ්ජාව, කීර්තිනාමයට හානි කිරීම හෝ දේශපාලන සංවේදීතාවය” හේතුවෙන් තොරතුරු වසන් කිරීමට අධිකරණ දෙපාර්තමේන්තුවට නොහැක. ඩිමොක්‍රටිකයන්, ජනාධිපතිවරයාගේ එක් රිපබ්ලිකන් විරුද්ධවාදියෙකු සහ හිටපු ට්‍රම්ප්ට පක්ෂපාතී කිහිප දෙනෙකුගෙන් යුත් අමුතු කොංග්‍රස් සන්ධානයක් විසින් මෙම නඩුවේ ලිපිගොනු හෙළිදරව් කිරීමට බල කිරීමේ උත්සාහය එක් කලෙක එතරම් සාර්ථක නොවූවද, මෙය කැපී පෙනෙන සිදුවීමක් විය. මෑතකදී, ට්‍රම්ප් පරිපාලනය ලිපිගොනු මුදා හැරීමට පක්ෂපාතී වූ රිපබ්ලිකන් නියෝජිතවරියක් වන කොලරාඩෝ හි ලෝරන් බෝබර්ට් මහත්මිය පවා මේ පිළිබඳව සාකච්ඡා කිරීමට සිචුවේෂන් රූම් වෙත කැඳවා තිබුණද, ඇය සිය මතය වෙනස් කළේ නැත. නමුත් සති අන්තය පුරාවට, කොන්ග්‍රස් ක්‍රියාමාර්ගය නොවැළැක්විය හැකි බව පැහැදිලි වූ පසු ට්‍රම්ප් ලිපිගොනු සම්බන්ධයෙන් තියුණු ලෙස සිය ස්ථාවරය වෙනස් කළේය. එප්ස්ටීන්ගේ කාරණය රිපබ්ලිකන් පක්ෂයේ න්‍යාය පත්‍රයට බාධාවක් වී ඇති බව ඔහු අවධාරණය කළ අතර එයින් ඉදිරියට යාමට තමන් කැමති බව පෙන්වා දුන්නේය. “අප ලැබූ සියලුම ජයග්‍රහණවලින් රිපබ්ලිකානුවන්ගේ අවධානය වෙනතකට යොමු කිරීමට මට අවශ්‍ය නැහැ,” යනුවෙන් ඔහු මෙම හදිසි වෙනසට හේතුව පැහැදිලි කරමින් අඟහරුවාදා පස්වරුවේ සමාජ මාධ්‍ය සටහනක සඳහන් කළේය.
එප්ස්ටීන් ලිපිගොනු නිකුත් කිරීමට ට්‍රම්ප්ගෙන් අත්සන!
