කටුනායක ගුවන්තොටුපොළේ සුවිශේෂී පහසුවක්! දැන් ගුවන් යානයට පැය 4කට පෙර ස්වයං පිරික්සුම් කටයුතු ඇරඹිය හැකියි

කටුනායක බණ්ඩාරනායක ජාත්‍යන්තර ගුවන්තොටුපොළින් (BIA) පිටත්ව යන මගීන්ට, ඔවුන්ගේ පියාසැරියට පෙර කටයුතු සරල කිරීමට සහ නම්‍යශීලී කිරීමට හැකිවන පරිදි, ස්වයං සේවා පහසුකම් පුළුල් කිරීමත් සමඟින් වැඩිදියුණු කළ පිරික්සුම් (check-in) අත්දැකීමක් දැන් භුක්ති විඳිය හැකිය.​ශ්‍රී ලංකන් ගුවන් සේවයේ ග්‍රවුන්ඩ් හෑන්ඩ්ලිං අංශය සමඟ එක්ව ගුවන්තොටුපළ හා ගුවන් සේවා (ශ්‍රී ලංකා) (පුද්.) සමාගම (AASL), මගීන්ට ඔවුන්ගේ පිරික්සුම් කටයුතු සහ ගමන් මලු භාරදීම ස්වයංව සම්පූර්ණ කිරීමට ඉඩ සලසන උසස් කළ ස්වයං පිරික්සුම් පද්ධතියක් හඳුන්වා දී ඇත.​ශ්‍රී ලංකන් ගුවන් සේවයේ ග්‍රවුන්ඩ් හෑන්ඩ්ලිං අංශයේ ගුවන්තොටුපළ ප්‍රධානී දීපාල් පල්ලේගංගොඩ මහතා පැවසුවේ, මගීන්ට දැන් ඔවුන්ගේ නියමිත ගුවන් ගමනට පැය හතරකට පෙර ගුවන්තොටුපළට පැමිණ, තම ස්වයං පිරික්සුම් කටයුතු තමන්ගේ වේගයට අනුව සිදු කර ගැනීමට අවසර ඇති බවයි.​”මෙම මුලපිරීම මගින් පෝලිම් අවම කිරීමෙන් සහ පර්යන්තය හරහා මගීන්ගේ ගමනාගමනය සුමටව සහතික කිරීමෙන් සමස්ත ගමන් අත්දැකීම වැඩිදියුණු කිරීම අරමුණු කරයි,” පල්ලේගංගොඩ මහතා පැවසීය.​ආරම්භයේදී BIA හි පිරික්සුම් ප්‍රදේශයේ ස්වයං පිරික්සුම් යන්ත්‍ර (self check-in machines) අටක් ස්ථාපනය කර තිබූ නමුත්, වැඩි මගීන් සංඛ්‍යාවකට එකවර පහසුකම් සැලසීම සඳහා එම සංඛ්‍යාව දැන් 20 දක්වා වැඩි කර ඇත.​ගුවන් මගීන් ඔවුන්ගේ ස්වයං පිරික්සුම් ක්‍රියාවලිය, ලබා දී ඇති පැය හතරක කාලසීමාව තුළ, ගුවන් යානයට ගොඩවීමට (boarding) අවම වශයෙන් පැයක් ඉතිරිව තිබියදී සම්පූර්ණ කරන ලෙස ද පල්ලේගංගොඩ මහතා උපදෙස් දුන්නේය.