ඇල්ල – වැල්ලවාය මාර්ගයේ එක් මං තීරුවක් කරඳගොල්ල ප්‍රදේශයෙන් අවහිර වී තිබේ.
ඒ පස් කඳු කඩා වැටීම හා ගල් පෙරළීම හේතුවෙනි.
කෙසේ වෙතත් එක් මංතීරුවක වාහන ධාවනයට පහසුකම් සලසා ඇති බව ආපදා කළමනාකරණ මධ්‍යස්ථානය ප්‍රකාශ කළේ ය.
මේ අතර මධ්‍යම, වයඹ සහ උතුරු-මැද පළාත්වලත් මන්නාරම සහ වව්නියා දිස්ත්‍රික්කවල ඇතැම් ස්ථානවලටත් අද (02) දිනයේ මි.මී. 100ට වැඩි තද වැසි ඇති විය හැකි බව කාලගුණ අනාවැකියේ දැක්වේ.
දකුණු සහ නැගෙනහිර පළාත්වල අද දිනයේ විටින් විට වැසි හෝ ගිගුරුම් සහිත වැසි ඇතිවිය හැකියි.
දිවයිනේ සෙසු ප්‍රදේශවල සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇති විය හැකි බවද කාලගුණ විද්‍යා දෙපාර්තමේන්තුව ප්‍රකාශ කළේ ය.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසද කාලගුණ විද්‍යා දෙපාර්තමේන්තුව ජනතාවට දැනුම් දෙන්නේය.
