මාවතගම, කහපත්වෙල කැබිලිතිගොඩ පුරාණ රජමහා විහාරයේ තැන්පත් කර තිබූ මිල කළ නොහැකි පැරණි බුදු පිළිමයක් සොරකම් කිරීමේ සිද්ධියට සම්බන්ධ සැකකරුවන් 14 දෙනෙකු අත්අඩංගුවට ගත් බව පොලිසිය තහවුරු කරයි. මාවතගම පොලිසිය විසින් සිදු කරන ලද කඩිනම් පරීක්ෂණයකින් පසු ජනවාරි 31 වනදා මෙම පිරිස අත්අඩංගුවට ගෙන ඇති අතර, සොරාගත් පිළිමය සහ අපරාධය සඳහා යොදාගත් වෑන් රථ දෙකක්ද පොලිස් භාරයට ගෙන ඇත. අත්අඩංගුවට පත් සැකකරුවන් අවුරුදු 22ත් 56ත් අතර වයස්වල පසුවන්නන් බව වාර්තා වේ.පොලිස් වාර්තාවලට අනුව මෙම සොරකම සිදුව ඇත්තේ 2026 ජනවාරි 28 වනදා රාත්රී කාලයේදීය. එදින පුද්ගලයන් සිව්දෙනෙකු අපරාධ පරීක්ෂණ දෙපාර්තමේන්තුවේ (CID) නිලධාරීන් ලෙස පෙනී සිටිමින් විහාරස්ථානයේ ආවාස ගෙයට පැමිණ ඇත. විහාරස්ථානයේ තිබූ අඩි 1.5ක් පමණ උසැති රන් පැහැති බුදු පිළිමය නිල පරීක්ෂණයකට අවශ්ය බව පවසමින් ඔවුන් භික්ෂූන් වහන්සේලා මුලා කර පිළිමය රැගෙන පලා ගොස් තිබේ.මාවතගම පොලිසිය මගින් මීගමුව, මාතලේ, තෙල්දෙනිය, රිදීගම, මොනරාගල සහ මතුගම යන ප්රදේශ ආවරණය වන පරිදි සිදුකළ පුළුල් විමර්ශනයකින් පසු මෙම සැකකරුවන් පිරිස කොටු කර ගැනීමට හැකි විය. ජනවාරි 31 වනදා පිළැස්ස මහේස්ත්රාත් අධිකරණයට ඉදිරිපත් කළ සැකකරුවන් 14 දෙනා එළඹෙන පෙබරවාරි 13 වනදා දක්වා රක්ෂිත බන්ධනාගාරගත කිරීමට මහේස්ත්රාත්වරයා නියෝග කළේය. දිවයින පුරා සිදුවන සංවිධානාත්මක පුරාවස්තු සොරකම්වලට මෙම කල්ලියේ සම්බන්ධයක් තිබේද යන්න පිළිබඳව මාවතගම පොලිසිය වැඩිදුර පරීක්ෂණ පවත්වයි.
කහපත්වෙල රජමහා විහාරයේ ප්රතිමාව සොරකම් කළ 14ක් දැලේ!
