කැලණි ගඟේ ජල මට්ටම අඛණ්ඩව ඉහළ යෑම හේතුවෙන් එහි දරුණු ගංවතුර අවදානම නොකඩවා වැඩි වෙමින් පවතින බව වාරිමාර්ග දෙපාර්තමේන්තුව අනතුරු අඟවයි. නාගලගම් වීදියේ මිනුම් කණුවේ අඩි 6.4ක් සටහන් කරමින් ගඟ දැනටමත් ප්රධාන ගංවතුර මට්ටමට පැමිණ ඇති බවත්, මට්ටම අඩි 7 ඉක්මවූ පසු එය අතිශය තීරණාත්මක ගංවතුර අවධියක් ලෙස සලකන බවත් එම දෙපාර්තමේන්තුව පවසයි. ඊට අමතරව, දැදුරු ඔය සහ අත්තනගලු ඔය ඇතුළු තවත් ගංගා කිහිපයකද ගංවතුර මට්ටම් අඛණ්ඩව ඉහළ යමින් පවතින බව දෙපාර්තමේන්තුව සඳහන් කළේය. මේ අතර, ‘දිට්වා’ සුළි කුණාටුවේ බලපෑම හේතුවෙන් අද දිනයේදීද උතුරු, උතුරු-මැද, වයඹ සහ මධ්යම පළාත්වලට මි.මී. 100 ඉක්මවූ වර්ෂාපතනයක් ලැබීමට ඉඩ ඇති බව කාලගුණ විද්යා දෙපාර්තමේන්තුව පවසයි. සුළි කුණාටුව ක්රමයෙන් දිවයිනෙන් ඉවතට ගමන් කරමින් සිටින බව කාලගුණ විද්යා අධ්යක්ෂ ජනරාල් අතුල කරුණානායක මහතා පැවසීය. දැදුරු ඔය, රාජාංගණය සහ කලා වැවෙන් පිටවන ජලය දැදුරු ඔය, මී ඔය සහ කලා ඔය හරහා පුත්තලම දිස්ත්රික්කයට ගලා ඒමත් සමඟ එම ප්රදේශයේ ගංවතුර තත්ත්වය උත්සන්න වෙමින් පවතින බව පුත්තලම දිස්ත්රික් ලේකම් සමන් සිල්වා මහතා පැවසීය. ජල මට්ටම ඉහළ යාම හේතුවෙන් සිරවී සිටින ජනතාවට සහාය වීම සඳහා නාවික හමුදාවේ සහාය ඇතිව ගලවා ගැනීමේ මෙහෙයුම් ක්රියාත්මක වෙමින් පවතින බවද ඒ මහතා කීය. මීට අමතරව, ජාතික ගොඩනැගිලි පර්යේෂණ සංවිධානය (NBRO) විසින් දිස්ත්රික්ක හතක ප්රාදේශීය ලේකම් කොට්ඨාස කිහිපයක් සඳහා රතු මට්ටමේ නාය යෑමේ අනතුරු ඇඟවීම් නිකුත් කරමින්, වහාම ආරක්ෂිත ස්ථාන කරා යන ලෙස පදිංචිකරුවන්ට දැනුම් දී තිබේ.
කැලණි ගඟේ අවදානම ඉහළට; දිස්ත්රික් 7කට රතු අනතුරු ඇඟවීම්!
