ගම්පොළ උඩපළාත ප්‍රාදේශීය ලේකම් ආත්මා දිල්රුක්ෂි ජයරත්න මහත්මියට, අම්බුලුවාව කේබල් කාර් ව්‍යාපෘතිය භාර ඉදිකිරීම් සමාගමට රුපියල් 100,000 ක වන්දියක් ගෙවන ලෙස ඊයේ (නොවැම්බර් 7, 2025) අභියාචනාධිකරණය නියෝග කළේය. ඒ, සිය නිල ධුරය තුළ අයුතු ලෙස බලපෑම් කරමින් ව්‍යාපෘතියට බාධා කිරීම හේතුවෙනි. තවද, අභියාචනාධිකරණ විනිසුරු ගිහාන් කුලතුංග මහතා විසින් ප්‍රාදේශීය ලේකම්වරියට ව්‍යාපෘතියට කිසිදු ආකාරයකින් බාධා කිරීමෙන් වළකින ලෙස ද නියෝග කර ඇත. විනිසුරුවරයා තීරණය කළේ ප්‍රාදේශීය ලේකම්වරිය ‘ultra vires’ (නීතියෙන් පැවරී ඇති බලතල ඉක්මවා) ක්‍රියා කර ඇති බවත්, අදාළ බලධාරීන් විසින් අනුමත කරන ලද ව්‍යාපෘතියට බාධා කර ඇති බවත් ය. මෙවැනි ස්වභාවයේ ගැටලු පිළිබඳව පුළුල් අධ්‍යයනයකින් පසුව රාජ්‍ය නිලධාරීන් කල්පනාකාරී තීරණ ගත යුතු බව ද විනිසුරුවරයා වැඩිදුරටත් අවධාරණය කළේය. පෙත්සම්කාර සමාගම වෙනුවෙන් ජනාධිපති නීතිඥ අලි සබ්‍රි මහතා සහ නීතිඥ නාමික් නාෆ්හාන් මහතා පෙනී සිටි අතර, අම්බුලුවාව භාරකාර අරමුදල වෙනුවෙන් ජනාධිපති නීතිඥ සංජීව ජයවර්ධන මහතා පෙනී සිටියේය. ප්‍රාදේශීය ලේකම්වරිය වෙනුවෙන් නීතිපති දෙපාර්තමේන්තුවේ නීති නිලධාරීන් පෙනී සිටියහ.
කොන්ත්‍රාත් සමාගමකට රුපියල් ලක්ෂයක වන්දි ගෙවීමට ගම්පොළ උඩපළාත ප්‍රාදේශීය ලේකම්ට නියෝග
