ජපානයේ නැගෙනහිරට 6.7ක භූ කම්පනයක්; සුනාමි අනතුරු ඇඟවීමක්!

ජපානයේ ඊසානදිග කලාපයට මූලික තක්සේරුව අනුව ප්‍රබලත්වය 6.7ක් වූ භූ කම්පනයක් සිදුව ඇති අතර, ඒ හේතුවෙන් ජපාන කාලගුණ විද්‍යා ඒජන්සිය (JMA) විසින් සුනාමි අනතුරු ඇඟවීමක් නිකුත් කර තිබේ. මෙම භූ කම්පනය එරට වේලාවෙන් අද (සිකුරාදා) පෙරවරු 11:44ට (GMT 02:44) අවමෝරි ප්‍රාන්තයේ (Aomori Prefecture) වෙරළට ඔබ්බෙන්, කිලෝමීටර් 20ක (සැතපුම් 12.4) ගැඹුරකින් සිදුව ඇතැයි JMA පවසයි. එක්සත් ජනපද භූ විද්‍යා සමීක්ෂණය (USGS) ද මෙම භූ කම්පනය 6.7ක් ලෙස වාර්තා කර තිබේ. ජපාන න්‍යෂ්ටික නියාමන අධිකාරිය කියා සිටියේ, කලාපයේ න්‍යෂ්ටික පහසුකම්වල ක්ෂණික අසාමාන්‍යතා කිසිවක් දක්නට නොලැබුණු බවයි. ජාතික විකාශක NHK වාර්තා කළේ, මීට පෙර සඳුදා එම කලාපයේම සිදුවී මාර්ග විනාශ කර, ජනෙල් කඩා බිඳ දමා, සෙන්ටිමීටර් 70ක් (අඩි 2.3) දක්වා සුනාමි තරංග ඇති කළ 7.5ක විශාල භූ කම්පනයට වඩා මෙම කම්පනයේ මට්ටම අඩු බවයි. සඳුදා සිදුවූ භූ කම්පනයෙන් පුද්ගලයන් 50 දෙනෙකුට තුවාල සිදු වූ අතර, ඉන් පසුව JMA විසින් උතුරේ හොකයිඩෝ සිට ටෝකියෝවේ නැගෙනහිරින් පිහිටි චිබා දක්වා පුළුල් ප්‍රදේශයක පදිංචිකරුවන්ට සතියක් ඇතුළත ප්‍රබල භූ කම්පනයක් නැවත ඇතිවීමේ වැඩි අවදානමක් ගැන අවධානයෙන් සිටින ලෙසට විශේෂ උපදෙස් මාලාවක් නිකුත් කර තිබුණි. 2011 වසරේදී මිනිසුන් 18,500ක් පමණ මිය ගිය හෝ අතුරුදහන් වූ සුනාමියක් ඇති කළ 9.0ක ප්‍රබල මුහුදුබත් භූ කම්පනයක මතකය ඊසානදිග කලාපයට තවමත් හොල්මන් කරයි. Nankai Trough ඔස්සේ ඇතිවිය හැකි ‘මහා භූ කම්පනයක්’ පිළිබඳව අනතුරු අඟවමින් JMA විසින් 2024 වසරේදී ජපානයේ පැසිෆික් වෙරළ තීරයේ දකුණු භාගය සඳහා පළමු විශේෂ උපදේශය නිකුත් කරන ලදී. Nankai Trough හි සිදුවන භූ කම්පනයක් සහ ඉන් ඇතිවන සුනාමියකින් පුද්ගලයන් 298,000ක් පමණ මිය යා හැකි බවත්, ඩොලර් ට්‍රිලියන 2ක් දක්වා හානියක් සිදුවිය හැකි බවත් රජය පවසා තිබේ. පැසිෆික් ‘ගිනි වළල්ලේ’ බටහිර දාරය ඔස්සේ ප්‍රධාන භූ තැටි හතරක් මත පිහිටා ඇති ජපානය, ලෝකයේ වඩාත්ම භූ කම්පන ක්‍රියාකාරී රටකි.