ගම්පහ රථවාහන පොලිස් නිලධාරීන්ගේ රාජකාරියට බාධා කරමින්, තමන් ජ්‍යෙෂ්ඨ නියෝජ්‍ය පොලිස්පතිවරයෙකුගේ (SDIG) සහෝදරිය බවට අසත්‍ය ලෙස ප්‍රකාශ කළ කාන්තාවක් ගම්පහ මහේස්ත්‍රාත් අධිකරණය විසින් නොවැම්බර් 3 වනදා දක්වා රක්ෂිත බන්ධානාගාරගත කර තිබේ.ගම්පහ පොලිස් වසමේ, කොටුගොඩ – උඩුගම්පොළ ප්‍රදේශයේදී රථවාහන පොලිස් නිලධාරීන් දෙදෙනෙකු සමඟ මෙම සැකකාරිය උණුසුම් වචන හුවමාරුවක නිරතවන වීඩියෝවක් සමාජ මාධ්‍ය ඔස්සේ සංසරණය වීමෙන් පසුව ඇය අත්අඩංගුවට ගෙන ඇත.පොලිසිය පැවසුවේ, මෝටර් රථයක් පදවාගෙන ගිය මෙම කාන්තාව මුලින්ම රථවාහන නිලධාරීන්ගේ නියෝග නොතකා රිය ධාවනය කර ඇති බවයි. පසුව, උඩුගම්පොළ හන්දියේදී ඇය නවතාගෙන ඇති අතර, එහිදී මෙම වාද විවාදය සිදුවී තිබේ. නැවතත් පොලිස් උපදෙස් නොතකා රිය ධාවනය කළ ඇය අවසානයේදී මිනුවන්ගොඩ පොලිස් හන්දියේදී අත්අඩංගුවට ගෙන ඇත.තවද, ඇය විසින් කරන ලද උසස් පොලිස් නිලධාරියෙකුගේ සහෝදරිය යන ප්‍රකාශය මුළුමනින්ම අසත්‍ය බවට විමර්ශනවලින් හෙළි වී ඇත.අනතුරුදායක හා නොසැලකිලිමත් ලෙස රිය පැදවීම, පොලිස් නියෝගවලට අකීකරු වීම සහ රාජකාරි කරන රජයේ සේවකයෙකුට බාධා කිරීම යන චෝදනා යටතේ සැකකාරියට එරෙහිව නඩු පවරා තිබේ.
ජ්‍යෙෂ්ඨ නියෝජ්‍ය පොලිස්පතිවරයෙකුගේ සහෝදරිය බව පවසා පොලිස් රාජකාරියට බාධා කළ කාන්තාව රිමාන්ඩ්
