තොරතුරු තාක්ෂණය වේගයෙන් වෙනස් වන වර්තමාන ලෝකයේ, සමාජ මාධ්ය හරහා හුවමාරු වන පුවත්වල සත්ය අසත්යතාව පිළිබඳව දැඩි අවධානයක් යොමු කිරීම අත්යවශ්ය බව අග්රාමාත්ය ආචාර්ය හරිනි අමරසූරිය මහත්මිය අවධාරණය කරයි. මාධ්ය මගින් ලබා දෙන තොරතුරු පිළිබඳ ජනතාව තුළ පවතින විශ්වාසය බිඳ වැටීම සමස්ත සමාජයේම පැවැත්මට එල්ල වන බරපතල තර්ජනයක් බව ඇය පෙන්වා දෙයි. කොළඹ ආනන්ද විද්යාලයේ පැවති “සංදේශය” මාධ්ය සම්මාන උළෙල අමතමින් ඇය මේ බව සඳහන් කළාය.අතීතයේදී තොරතුරු සහ දැනුම හැසිරවීමේ බලය සීමිත පිරිසකට පමණක් හිමි වුවද, වර්තමාන තාක්ෂණික විප්ලවයත් සමඟ මාධ්ය භාවිතය ප්රජාතන්ත්රීකරණය වී තිබේ. අද වන විට ඕනෑම පුරවැසියෙකුට තොරතුරු නිෂ්පාදනය කිරීමට සහ බෙදා හැරීමට අවකාශය සැලසී ඇත. මෙය යහපත් ප්රවණතාවක් වුවද, එම නිදහස සමඟ පැමිණෙන වගකීම සහ විශ්වාසනීයත්වය පිළිබඳ ගැටලු රැසක් මතු වී ඇති බව අග්රාමාත්යවරිය මෙහිදී සිහිපත් කළාය.වැරදි හෝ හිතාමතා විකෘති කරන ලද තොරතුරු හේතුවෙන් ගෝලීය වශයෙන් පවා සමාජ අර්බුද නිර්මාණය වී මිනිස් ජීවිත විනාශ වූ අවස්ථා ඇති බව ඇය පෙන්වා දුන්නාය. අන්තර්ජාලය වෙත අප මුදාහරින දත්ත සහ තොරතුරු මැකී නොයන බැවින්, කිසිදු සොයා බැලීමකින් තොරව පෞද්ගලික හෝ පොදු තොරතුරු ප්රචාරය කිරීමෙන් වැළකිය යුතුය. අසත්ය තොරතුරු සමාජගත වීමෙන් නායකයින්, වැඩිහිටියන් සහ ආයතන කෙරෙහි පවතින විශ්වාසය පළුදු වන බව ඇය වැඩිදුරටත් පැවසුවාය.ක්ෂේත්රයට පිවිසෙන නවක මාධ්යවේදීන්ට සහ සිසුන්ට විශාල වගකීමක් පවතින බව පෙන්වා දුන් අග්රාමාත්යවරිය, තමන් ඉදිරිපත් කරන තොරතුරක සත්යතාව වෙනුවෙන් පෙනී සිටීමට ඔවුන්ට හැකි විය යුතු බව ප්රකාශ කළාය. ජ්යෙෂ්ඨ මාධ්යවේදීන් අනුගමනය කළ වෘත්තීය ගරුත්වය ආරක්ෂා කරමින්, තොරතුරු මූලාශ්රවල නිවැරදිභාවය තහවුරු කිරීම මාධ්ය සදාචාරයේ මූලිකාංගයකි. විශ්වාසනීය තොරතුරු ගලා යන සංස්කෘතියක් ගොඩනැගීම සමාජ ස්ථාවරත්වයට අතිශය වැදගත් වේ.වර්තමාන ශිෂ්ය පරපුර ඩිජිටල් සහ මාධ්ය සාක්ෂරතාවයෙන් සන්නද්ධ කිරීම රජයේ ප්රමුඛ අරමුණකි. මේ නිසාවෙන්ම ඉදිරි අධ්යාපන ප්රතිසංස්කරණ යටතේ විවේචනාත්මක චින්තනය සහ මාධ්ය හැසිරවීම පිළිබඳ විෂය කරුණු ඇතුළත් කිරීමට පියවර ගෙන ඇත. තාක්ෂණයෙන් වෙනස් වූ ලෝකයට ගැළපෙන පරිදි දරුවන් සූදානම් කිරීම හරහා වඩාත් සවිඥානික පුරවැසි පරපුරක් බිහිකිරීම මෙහි අපේක්ෂාවයි.සමාජ මාධ්ය පරිශීලකයින් ලෙස අපට ලැබෙන ඕනෑම තොරතුරක් අනෙකා වෙත යොමු කිරීමට පෙර එහි නිරවද්යතාව පරීක්ෂා කිරීමේ සදාචාරාත්මක වගකීමක් අප සැම සතු වේ. වැරදි තොරතුරු මත තීරණ ගැනීමෙන් සමාජයම අගාධයකට ඇද වැටිය හැකි බව අග්රාමාත්යවරිය අනතුරු ඇඟවූවාය. ඒ නිසාම සෑම පුවතක් දෙසම විමර්ශනාත්මක ඇසින් බැලීමට ජනතාව හුරු විය යුතු බව ඇය පවසා සිටියාය.ආනන්ද විද්යාලයීය මාධ්ය ඒකකය සංවිධානය කළ මෙම සම්මාන උළෙලේදී ප්රවීණ මාධ්යවේදීන් හට යාවජීව සම්මාන පිරිනැමීමද අග්රාමාත්යවරිය අතින් සිදු විය. මෙම අවස්ථාවට සෞඛ්ය හා ජනමාධ්ය අමාත්යංශයේ ලේකම් අනිල් ජාසිංහ මහතා ඇතුළු සම්භාවනීය පිරිසක් සහභාගී වූහ. පාසල් සිසුන්ගේ මාධ්ය කුසලතා ඇගයීමට ලක් කිරීම සහ ඔවුන්ට වගකීම් සහගත මාධ්ය භාවිතයක් හුරු කිරීම මෙහි ප්රධාන අරමුණ විය.
ඩිජිටල් අවකාශයේ වගකීම: තොරතුරු බෙදා ගැනීමට පෙර දෙවරක් සිතන්නැයි අග්රාමාත්යවරියගෙන් ඇමතුමක්!
