දරුවන්ට මඟ විවර කිරීම වැඩිහිටි වගකීමයි – අගමැති ආචාර්ය හරිනි අමරසූරිය

රට ගොඩනැගීමට අවශ්‍ය ශක්තිය, හැකියාව සහ ආකල්පය රටේ දරුවන් සතු බවත්, ඔවුන්ට ඉදිරියට යාමට මාවත් විවර කර දීම වැඩිහිටියන් සතු වගකීම බවත් අග්‍රාමාත්‍ය සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය මහත්මිය පවසයි.​ඇය මෙම අදහස් පළ කළේ ඔක්තෝබර් 10 වන දින අරලියගහ මන්දිරයේදී පැවති “ශ්‍රී ලංකා නිපුණතා ප්‍රදර්ශනය 2025” (Sri Lanka Skills Expo 2025) සමාරම්භක උත්සවයට සහභාගී වෙමිනි.​ශ්‍රී ලංකාවේ තරුණ විරැකියාවට විසඳුම් සෙවීමේ අරමුණින් තෙවන වරටත් සංවිධානය කර ඇති මෙම ප්‍රදර්ශනය ඔක්තෝබර් 10 සහ 11 යන දිනවල අරලියගහ මන්දිරයේ ප්‍රධාන ශාලාවේදී පැවැත්වේ. මෙය කර්මාන්ත ක්ෂේත්‍ර නිපුණතා කවුන්සිල (ISSC) සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ ඒකාබද්ධ මුලපිරීමකි. ​“මෙය අප විසින් ආරම්භ කර ඇති අධ්‍යාපන පරිවර්තන ක්‍රියාවලියේ සන්ධිස්ථානයක්,” යැයි පැවසූ අග්‍රාමාත්‍යවරිය, මෙම ප්‍රදර්ශනය මගින් දරුවන් තමන්ගේම මාවත් හඳුනා ගැනීමට දිරිමත් කරමින්, අධ්‍යාපන අංශය තුළ ඇති අවස්ථා පුළුල් කිරීමට අපේක්ෂා කරන බවද පැවසුවාය.​මෙම වැඩසටහන මගින් සිසුන්ගේ උනන්දුව, දෙමාපිය අපේක්ෂාවන් සහ පෞද්ගලික හැකියාවන් සලකා බලා, ඔවුන්ගේ අනාගත දිශාවන් අවබෝධ කර ගැනීමට මෙන්ම, මතුවෙමින් පවතින ගෝලීය අවස්ථා ගවේෂණය කිරීමටද අගනා අත්දැකීම් ලබා දෙන බව ඇය සඳහන් කළාය.​“දැන් අධ්‍යාපනය සම්පූර්ණ කර සමාජයට පිවිසීමට සූදානම් වන පරම්පරාවට අභියෝග රැසකට මුහුණ දීමට සිදුව ඇත. තාක්ෂණය මගින් ගෙන එන වේගවත් වෙනස්කම් සමඟ වෘත්තීන් සහ සමාජයන් වෙන කවරදාටත් වඩා වේගයෙන් විකාශනය වෙමින් පවතී. එබැවින්, අපගේ අධ්‍යාපන ගමන මෙම පරිවර්තනයන් පිළිබඳ නිසි අවබෝධයකින් යුතුව අනුවර්තනය විය යුතුයි,” යනුවෙන් ඇය අවධාරණය කළාය.​තවද, මෙවැනි වැඩසටහන් මගින් තරුණ තරුණියන් ජාතික සංවර්ධන සැලැස්මට ඒකාබද්ධ කිරීම, ගුරුවරුන් හා දෙමාපියන් සමඟ එක්ව ආර්ථිකය ශක්තිමත් කිරීමට ඔවුන්ට දායක විය හැකි ආකාරය අවබෝධ කර ගැනීමට උපකාරී වන බව ආචාර්ය අමරසූරිය මහත්මිය වැඩිදුරටත් ප්‍රකාශ කළාය.​“අනාගත නායකත්වය භාරගන්නා පරම්පරාව ඔබයි. එම නායකත්වය අත්කර ගැනීමට අවශ්‍ය අධ්‍යාපන පදනම සහ සමාජ-ආර්ථික පරිසරය ඔබට ලැබෙන බව අපි සහතික කරන්නෙමු. එය ඉටු කිරීම වැඩිහිටියන් ලෙස අපගේ වගකීම වන අතර, අප අපගේ කොටස ඉටු කරන්නෙමු. මෙම අවස්ථාවෙන් ප්‍රයෝජන ගෙන රට ඉදිරියට ගෙන යන ලෙස අපි ඔබට ආරාධනා කරන්නෙමු,” යනුවෙන් අග්‍රාමාත්‍යවරිය පැවසුවාය.