බණ්ඩාරවෙල කොට්ඨාස අපරාධ විමර්ශන ඒකකයේ නිලධාරීන් සහ දියතලාව යුධ හමුදා කඳවුරේ භට පිරිස් එක්ව සිදුකළ ඒකාබද්ධ මෙහෙයුමකින් අනතුරුව, මහා පරිමාණ කංසා වගාවක් සොයාගෙන විනාශ කර තිබේ. හල්දුම්මුල්ල පොලිස් වසමට අයත් ඉලුක්තැන්න රක්ෂිත ප්‍රදේශයේ දින දෙකක් පුරා මෙම මෙහෙයුම ක්‍රියාත්මක වූ අතර, එහිදී අක්කර ගණනාවක් පුරා ව්‍යාප්ත වූ කංසා වගා කිහිපයක් පොලිසිය විසින් අනාවරණය කර ගන්නා ලදී. ඒ අනුව, ආසන්න වශයෙන් අක්කර 2.5 බැගින් වූ බිම් කොටස් දෙකක්, අක්කර 2 ක බිම් කොටසක්, අක්කර 1 ක බිම් කොටසක්, අක්කර 0.5 ක බිම් කොටසක් සහ අක්කර 0.25 ක බිම් කොටසක් ඇතුළුව තිබූ සමස්ත කංසා වගාවම පොලිසිය විසින් විනාශ කර දැමුණි. ඊට අමතරව, වියළන ලද කංසා කිලෝග්‍රෑම් 115 ක් පමණ ද එහි තිබී සොයාගෙන ඇත. අධිකරණ සාක්ෂි සඳහා සාම්පල ලබා ගැනීමෙන් පසු, සමස්ත වගාවම ගිනි තබා විනාශ කර ඇත. මෙම මෙහෙයුම සිදු කිරීමට පෙර වගාවට සම්බන්ධ සැකකරුවන් ප්‍රදේශයෙන් පලා ගොස් ඇති බවත්, ඔවුන් හඳුනාගෙන අත්අඩංගුවට ගැනීම සඳහා විමර්ශන ක්‍රියාත්මක බවත් පොලිසිය වැඩිදුරටත් සඳහන් කළේය.
දැවැන්ත කංසා වැටලීමක්: අක්කර ගණනක වගා විනාශ කරයි
