’දිට්වා’ සුළි කුණාටුවෙන් පීඩාවට පත් ජනතාවට සහන සැලසීම සහ ප්රතිසංස්කරණ කටයුතු සඳහා සහය දැක්වීමේ පියවරක් ලෙස, එළඹෙන අගෝස්තු මාසයේ පැවැත්වෙන ශ්රී ලංකා සංචාරයේදී අමතර විස්සයි-20 (T20I) තරග කිහිපයකට ක්රීඩා කිරීමට ඉන්දියාව එකඟතාව පළ කර ඇති බව ශ්රී ලංකා ක්රිකට් ආයතනයේ සභාපති ශම්මි සිල්වා මහතා පවසයි. මාධ්ය වෙත අදහස් දක්වමින් සභාපතිවරයා සඳහන් කළේ, අයි.සී.සී. ලෝක ටෙස්ට් ශූරතාවලිය යටතේ පැවැත්වෙන තරගාවලිය සඳහා ඉන්දීය ජාතික කණ්ඩායම මෙරටට පැමිණෙන අවස්ථාවේදී මෙම අමතර විස්සයි-20 තරගාවලිය පවත්වන බවයි. දිට්වා සුළි කුණාටුවෙන් දිවයිනේ ප්රදේශ රැසකට සිදු වූ දැවැන්ත විනාශය හමුවේ ඉන්දියාව ශ්රී ලංකාව සමඟ පවතින සහයෝගීතාව මෙයින් මනාව පිළිබිඹු වන බව ද ඔහු පෙන්වා දුන්නේය.සුළි කුණාටුවෙන් පීඩාවට පත්වූවන්ට සහන සැලසීම සඳහා අරමුදල් රැස්කිරීමේ අරමුණින් දෙසැම්බර් මස අගදී විස්සයි-20 තරග දෙකකට ක්රීඩා කිරීමට ඉන්දියාව මීට පෙර එකඟතාව පළ කර තිබූ බව ද ශම්මි සිල්වා මහතා මෙහිදී අනාවරණය කළේය. එහෙත් පවතින කාලය සීමිත වීම සහ විකාශන කටයුතු සඳහා ආයතනයක් සම්බන්ධ කර ගැනීමට නොහැකි වීම හේතුවෙන් එම අවස්ථාවේදී තරග සංවිධානය කිරීමට නොහැකි වී තිබේ. “දෙසැම්බර් අවසානයේ පැමිණ තරග දෙකක් ක්රීඩා කර අරමුදල් රැස් කිරීමට ඉන්දියාවේ කැමැත්ත තිබුණත්, විශේෂයෙන්ම විකාශන ආයතනයක් නොමැති වීම නිසා එය සංවිධානය කිරීමට ප්රමාණවත් කාලයක් තිබුණේ නැහැ,” යැයි ඔහු වැඩිදුරටත් පැවසීය.ඉන්දියාව ලබාදෙන මෙම සහයෝගය අගය කළ ශ්රී ලංකා ක්රිකට් සභාපතිවරයා, අගෝස්තු මාසයේ පැවැත්වෙන මෙම අමතර තරග තුළින් ලැබෙන ආදායම සහ ඉන් ඇතිවන මහජන අවධානය දැනට ක්රියාත්මක සහන හා ප්රතිසංස්කරණ කටයුතු සඳහා විශාල රුකුලක් වනු ඇතැයි ද සඳහන් කළේය.
දිට්වා සහන අරමුදලට ශක්තියක් වෙන්න ඉන්දීය පිලෙන් අමතර විස්සයි-20 තරගාවලියක්!
