“දිට්වා” සුළි කුණාටුව: වැසි අඩු වෙයි, දැඩි සුළං ගැන අවධානය!

“දිට්වා” සුළි කුණාටුව නොවැම්බර් 29 වන දින රාත්‍රී 11.30 වන විට යාපනයට උතුරින් කිලෝමීටර් 130ක් පමණ දුරින්, උතුරු අක්ෂාංශ 10.7° සහ නැගෙනහිර දේශාංශ 80.6° ආසන්නයේ කේන්ද්‍රගත වී ඇත. එය ඉදිරි පැය 24 තුළ උතුරු තමිල්නාඩු වෙරළට සමාන්තරව උතුරට ගමන් කිරීමට වැඩි ඉඩක් පවතින අතර, පවතින වැසි තත්ත්වය අද (නොවැම්බර් 30) දිනය වන විට අඩු වනු ඇත. කෙසේ වෙතත්, උතුරු, උතුරු-මැද, වයඹ, බස්නාහිර, සබරගමුව පළාත්වල සහ ගාල්ල, මාතර, මහනුවර සහ නුවරඑළිය දිස්ත්‍රික්කවල වැසි වාර කිහිපයක් ඇති විය හැක. තවද, උතුරු, උතුරු-මැද, වයඹ පළාත්වල සහ ත්‍රිකුණාමලය දිස්ත්‍රික්කයේ විටින් විට පැයට කිලෝමීටර් (50-60) පමණ වන ඉතා තද සුළං අපේක්ෂා කළ හැකි බැවින්, තද සුළං හේතුවෙන් සිදුවිය හැකි හානි අවම කර ගැනීම සඳහා ප්‍රමාණවත් පූර්වාරක්ෂාවන් ගන්නා ලෙස මහජනතාවගෙන් කාරුණිකව ඉල්ලා සිටී.