දිල්ලි රතු කොටුව අසල පිපිරීමක්: 9ක් මරුට; ශ්‍රී ලංකා නායකයින් ශෝකය පළ කරයි

ඉන්දියාවේ දිල්ලි නුවර රතු කොටුව (Red Fort) අසල පසුගිය සඳුදා සවස සිදුවූ ප්‍රබල පිපිරීමකින් පුද්ගලයන් අවම වශයෙන් නව දෙනෙකු මියගොස් තවත් 20 දෙනෙකුට වැඩි පිරිසක් තුවාල ලබා ඇති බව බලධාරීහු පවසති. මෙම පිපිරීම රතු කොටු මෙට්‍රෝ දුම්රිය ස්ථානයේ අංක 1 දොරටුව ආසන්නයේ සිදුවී ඇති අතර, එය ජනප්‍රිය සංචාරක මධ්‍යස්ථානයක් වන පැරණි දිල්ලි ප්‍රදේශය පුරා කම්පන රැල්ලක් ඇති කළේය. ඒ ආසන්නයේ තිබූ වාහන කිහිපයක ගිනිගැනීම් සිදුවූ අතර, එම ස්ථානයෙන් ලැබුණු වීඩියෝවලට අනුව මාර්ගය පුරා විනාශ වූ වාහන, සුන්බුන් සහ සිරුරු විසිරී තිබෙනු දක්නට ලැබිණි. සවස 6:30 ට පමණ Swift Dzire මෝටර් රථයක පිපිරීමක් පිළිබඳව දැනුම් දුන් බව දිල්ලි පොලිසිය ප්‍රකාශ කළ අතර, ප්‍රදේශවාසීන් ඉවත් කර ගිනි නිවීමට ගිනි නිවන රථ 20ක් පමණ යොදවා ඇත. තුවාල ලැබූවන් Lok Nayak රෝහලට (LNJP) ගෙන ගොස් ඇති අතර, එහිදී මරණ අටක් තහවුරු විය. පොලිස් ආරංචි මාර්ග පවසන්නේ එය “ඉතා ප්‍රබල පිපිරීමක්” බවත්, අධිකරණ වෛද්‍ය හා බෝම්බ නිෂ්ක්‍රීය කිරීමේ කණ්ඩායම් සුන්බුන් පරීක්ෂා කිරීම සඳහා එම ස්ථානය මුද්‍රා තබා ඇති බවත්ය. මුම්බායි, ජායිපූර්, උත්තර් ප්‍රදේශ් සහ උත්තරාකන්ඩ් යන ප්‍රාන්තවල බලධාරීන් මෙම සිද්ධියෙන් පසු ඉහළ අවධානයකින් පසුවන අතර, මෙම පිපිරීම, ජම්මු සහ කාශ්මීරයේ පුල්වාමා දිස්ත්‍රික්කයේ වෛද්‍යවරයකුට සම්බන්ධ දේපළවලින් හර්යානා ප්‍රාන්තයේ ෆරීඩාබාද් පොලිසිය විසින් පුපුරණ ද්‍රව්‍ය කිලෝග්‍රෑම් 2,900 ක් පමණ සොයා ගැනීමෙන් පැය කිහිපයකට පසුව සිදුවීම හේතුවෙන් සිද්ධි දෙක අතර සම්බන්ධයක් තිබේදැයි විමර්ශනය කෙරේ. මේ වන විට ඝාතනය වූ සංඛ්‍යාව 9ක් ලෙස වාර්තා වන මෙම සිදුවීම ත්‍රස්ත ප්‍රහාරයක් ලෙස විමර්ශනය කෙරේ.​මේ අතර, නවදිල්ලියේ සංකේතාත්මක රතු කොටුව ආසන්නයේ සිදුවූ පිපිරීමෙන් විපතට පත් වූවන් වෙනුවෙන් ශ්‍රී ලංකා නායකයෝ සිය ශෝකය ප්‍රකාශ කළහ. විදේශ කටයුතු අමාත්‍ය විජිත් හේරත් මහතා පැවසුවේ ශ්‍රී ලංකාව ඉන්දීය ජනතාව සමඟ සහයෝගයෙන් සිටින බවයි. “අද සවස දිල්ලියේ පිපිරීම පිළිබඳ පුවතින් කම්පාවට පත් වුණා. ශ්‍රී ලංකාව ඉන්දීය ජනතාව සමඟ සහයෝගයෙන් සිටිනවා. බලපෑමට ලක්වූ සියලු දෙනා වෙනුවෙන් අපගේ හදවත් සමඟයි,” යනුවෙන් ඔහු සඳුදා ‘X’ හි සටහනක් තබා තිබිණි. මේ අතර විපක්ෂ නායක සජිත් ප්‍රේමදාස මහතා පැවසුවේ ත්‍රස්තවාදයේ ශාපය තුරන් කිරීමට සියලු දෙනා එක්විය යුතු බවයි. “නවදිල්ලියේ ත්‍රස්ත ප්‍රහාරය ගැන අසා කම්පාවට පත්වුණා. ත්‍රස්තවාදයේ ශාපය තුරන් කිරීමට සියලු දෙනා එක්විය යුතුයි. මෙම දරුණු ප්‍රහාරයෙන් පීඩාවට පත් වූවන් වෙනුවෙන් අපගේ සිතුවිලි සහ යාඥාවන් පවතිනවා” යනුවෙන් ඔහු ද සඳුදා ‘X’ හි සටහනක් තබමින් ප්‍රකාශ කළේය. ජම්මු සහ කාශ්මීර් සහ හර්යානා පොලිස් කණ්ඩායම් විසින් ෆරීඩාබාද්හි නිවාස දෙකකින් පුපුරණ ද්‍රව්‍ය කිලෝග්‍රෑම් දහස් ගණනක් සහ අවි ආයුධ තොගයක් සොයා ගැනීමෙන් පැය කිහිපයකට පසුව මෙම පිපිරීම සිදුවී ඇති අතර, පිපිරීම සිදුවූ මෝටර් රථය මෙම මොඩියුලයට සම්බන්ධ දකුණු කාශ්මීරයේ පුල්වාමාහි වෛද්‍යවරයකුට අයත් එකක් බව ඉන්දීය බලධාරීහු පවසති.