පවතින වර්ෂාපතනයේ යම් අඩුවීමක් දක්නට ලැබුණද, පෙර පැවති තද වැසි හේතුවෙන් පසෙහි පවතින අස්ථාවර බව සැලකිල්ලට ගෙන නිකුත් කර ඇති නායයෑමේ පූර්ව අනතුරු ඇඟවීම් තවදුරටත් දීර්ඝ කිරීමට ජාතික ගොඩනැගිලි පර්යේෂණ සංවිධානය (NBRO) පියවර ගෙන ඇත. පසුගිය නොවැම්බර් සහ දෙසැම්බර් මාසවල ඇද හැලුණු අධික වර්ෂාව නිසා බොහෝ බෑවුම් සහිත ප්රදේශවල නායයෑමේ පූර්ව ලක්ෂණ මතු වී ඇති බැවින්, සුළු වර්ෂාවකදී පවා නායයෑම් හෝ පස් කඩා වැටීම් සිදුවීමේ දැඩි අවදානමක් පවතින බව එම සංවිධානයේ ජ්යෙෂ්ඨ භූ විද්යාඥ ආචාර්ය වසන්ත සේනාධීර මහතා පෙන්වා දෙයි.ඒ අනුව, බදුල්ල දිස්ත්රික්කයේ ප්රාදේශීය ලේකම් කොට්ඨාශ රැසකට පනවා තිබූ පළමු අදියරේ (විමසිලිමත් වීමේ) අනතුරු ඇඟවීම එලෙසම ක්රියාත්මක වේ. ලුණුගල, මීගහකිවුල, වැලිමඩ, කන්දකැටිය, හාලිඇල, බදුල්ල, ඌව පරණගම සහ පස්සර යන ප්රදේශ මේ යටතට ඇතුළත් වන අතර, එම ප්රදේශවල වෙසෙන ජනතාව සිය අවට පරිසරය පිළිබඳ දැඩි අවධානයකින් පසුවිය යුතු බව ජාතික ගොඩනැගිලි පර්යේෂණ සංවිධානය අවධාරණය කරයි.මීට අමතරව, මහනුවර දිස්ත්රික්කයේ මිනිපේ සහ උඩුදුම්බර යන කොට්ඨාශ සඳහා නිකුත් කළ පළමු මට්ටමේ අනතුරු ඇඟවීම් ද අඛණ්ඩව බලාත්මක වේ. මාතලේ දිස්ත්රික්කයේ විල්ගමුව, උකුවෙල, අඹගග කෝරළේ, රත්තොට සහ ලක්ගල-පල්ලේගම යන ප්රදේශ මෙන්ම නුවරඑළිය දිස්ත්රික්කයේ නිල්දණ්ඩාහින්න, වලපනේ, මතුරට සහ හඟුරන්කෙත යන ප්රදේශවල ජනතාවට ද විමසිලිමත්ව සිටින ලෙස දැනුම් දී ඇත.ආචාර්ය වසන්ත සේනාධීර මහතා සඳහන් කළේ මෝසම් වැසි සක්රීයව පවතින පසුබිමක, පරිසරයේ පවතින භූ විද්යාත්මක වෙනස්කම් සහ ලැබෙන වර්ෂාපතන දත්ත නිරන්තර විශ්ලේෂණයකට ලක් කරන බවයි. ඒ අනුව, තත්ත්වය සමීක්ෂණය කරමින් ඉදිරියේදී මෙම නිවේදන වෙනස් කිරීමට හෝ ඉවත් කිරීමට කටයුතු කරන බවත්, එතෙක් අවදානම් සහිත බෑවුම්වල වෙසෙන ජනතාව පූර්ව සූදානමකින් සිටීම අත්යවශ්ය බවත් ඔහු වැඩිදුරටත් කියා සිටියේය.විශේෂයෙන්ම, පසෙහි පැලීම් ඇතිවීම, ගොඩනැගිලිවල බිත්ති සහ පොළොවේ හදිසි පිපිරීම් මතු වීම, ගස් හෝ විදුලි කණු ඇලවීම සහ ජල උල්පත් හදිසියේ මතු වීම වැනි නායයෑමේ පූර්ව ලක්ෂණ පිළිබඳ නිරන්තරයෙන් විමසිලිමත් වන ලෙස ජාතික ගොඩනැගිලි පර්යේෂණ සංවිධානය මහජනතාවගෙන් ඉල්ලා සිටී. වර්ෂාව අඩු වුවද පස සංතෘප්ත වී පවතින බැවින් පවතින අවදානම සුළුවෙන් තක්සේරු නොකළ යුතු බවට නිලධාරීන් අනතුරු අඟවයි.
නායයෑමේ අවදානම තවදුරටත්: දිස්ත්රික්ක 4ක ප්රාදේශීය ලේකම් කොට්ඨාශ රැසකට අවධානයෙන් සිටින ලෙස දැනුම් දෙයි
